Qyzylorda oblysynda sýdia 12 azamattyq is boiynsha otyrystardy ótkizbei, sheshim shyǵarǵan. Ister baspana jáne jerdi satý-satyp alýǵa qatysty bolǵan, dep habarlaidy QazAqparat QR Sybailas jemqorlyqqa qarsy is-qimyl agenttigine silteme jasap.
«Biylǵy 10 jeltoqsanda Shieli aýdandyq sotynyń sýdiasy Qurmanbai men onyń hatshysy Qydyrálievaǵa qatysty aiyptaý úkimi shyǵaryldy. Olarǵa tiisinshe 2 jyl 6 aiǵa jáne 2 jylǵa bas bostandyǵynan aiyrý jazasy taǵaiyndaldy (Qydyrálievanyń kámelettik jasqa tolmaǵan 4 balasy, onyń ishinde 1 emizýli balasy bolǵandyqtan, jazasy keiinge qaldyryldy).
Qurmanbai jalǵan ádiletsiz sot aktilerin shyǵarǵany (QK 369-baby 3-bóligi) jáne qyzmettik jalǵandyq jasaǵany úshin (QK 418-baby 1-bóligi) kináli dep tanyldy. Qydyrálieva sybailastyǵy úshin qylmystyq jaýapkershilikke tartyldy», - delingen habarlamada.
Atap aitqanda, Qurmanbai sot otyrystaryn naqty ótkizbesten, sondai-aq jalǵan málimetter engizý arqyly 12 azamattyq is boiynsha sheshim shyǵarǵan. Ister turǵyn úiler men jer telimderin satý- satyp alý mámilelerin jaramdy dep tanýǵa qatysty.
«Sottalýshylardyń jas balalary bolǵandyqtan, sot Qurmanbaidyń jazasyn 5-ten 2,6 jylǵa deiin, Qydyrálievanyń jazasyn 4-ten 2 jylǵa deiin jeńildetetin jaǵdai dep tanydy.
Sondai-aq, olar ómir boiyna memlekettik qyzmette laýazym atqarý quqyǵynan aiyryldy.
Qurmanbai sot zalynda qamaýǵa alyndy. Úkim zańdy kúshine engen joq», - dedi agenttikten.
