"Biýdjet qarjysyn jymqyrdy" dep aiyptalǵan Qazaqstannyń energetika ministriniń burynǵy orynbasary Anatolii Shkarýpanyń ústinen qozǵalǵan qylmystyq isti sot Qaraǵandyǵa jiberdi. Buǵan deiin Shkarýpa men onyń advokattary isti Nur-Sultanda qaraýdy suraǵan. Biraq sot olardyń ótinishin qanaǵattandyrmady.
Aldyn ala tyńdaýdan keiin Saran qalalyq sotynyń sýdiasy Talǵat Ekzekov 15 qarashada túnde "aiyptaý aktisi qai jerde qurastyrylsa (Qaraǵandy), isti sol jerde qaraý týraly" qaýly shyǵardy.
"Áriptesterimizben aqyldasa otyryp, bul sot sheshimine shaǵym túsiremiz dep kelistik. Sot Nur-Sultanda ótýi tiis dep sanaimyz" dedi Anatolii Shkarýpanyń advokaty Nurlan Beisekeev Azattyq tilshisine.
Juma kúni bolǵan sot tyńdaýy kezinde Shkarýpanyń advokaty prokýrordy aýystyrý týraly ótinish jasady. Al sýdia Ekzekov "prokýrordyń iske aralasýyna kedergi keltiretin jait tabylmaǵandyqtan" ótinishti qanaǵatandyrmady.
Bir jyldan astam ýaqyttan beri qamaýda otyrǵan Shkarýpamen birge bul iste taǵy eki adam bar: "Turǵyn úi-kommýnaldyq sharýashylyǵyn damytý qory" basqarmasynyń burynǵy tóraǵasy Qaisar Baidaly jáne ENERCO kompaniiasynyń direktory Erlan Nábiev. Nábiev úiqamaqta otyrsa, Baidaly qamaýǵa alynǵan. Úsheýine de "Senip tapsyrylǵan asa iri kólemdegi bóten múlikti iemdenip aldy nemese talan-tarajǵa saldy" degen aiyp taǵylǵan.
Tergeý boljamy boiynsha, Anatolii Shkarýpa Qaraǵandy oblysy Saran qalasynyń ákimi bolǵan tusta ortalyq jylý jelisi men qazandyǵy joq qaladaǵy turǵyn úilerge "jylý esepteýge arnalǵan aspaptardy satyp alý jáne ornatý úshin" turǵyn úi-kommýnaldyq sharýashylyǵyn damytý qoryna biýdjetten bólingen aqsha qoldy bolǵan. Tergeýshiler atalǵan qor ENERCO kompaniiasyna 215 million teńgeden astam qarjyny zańsyz aýdarǵan dep sanaidy. 44 jastaǵy Anatolii Shkarýpa taǵylǵan aiypty moiyndamaidy. Ózge aiyptalýshylar da aiyppen kelispeidi.
2018 jyly qazanda Qazaqstan energetika ministriniń orynbasary bolyp taǵaiyndalǵan Anatolii Shkarýpa sol jylǵy qarashada tutqyndalǵan. Shkarýpaǵa deiin osy qyzmetti atqarǵan Baqytjan Jaqsaliev 2018 jyly shildede Aqmola oblysy aýmaǵyndaǵy shipajaida kóldi tazartý jobasynda bolǵan yqtimal sybailas jemqorlyqty tergeý aiasynda kúdikti retinde úiqamaqqa alynǵan.
Byltyr 7 qarashada Aqordada ótken Qaýipsizdik keńesiniń otyrysynda sol kezdegi bas prokýror Qairat Qojamjarov Anatolii Shkarýpanyń Saran ákimi bolǵan kezde "biýdjetten 215 million teńgeni jymqyrýǵa qatysy bar" dep málimdegen. Shkarýpa 2014 jyldan 2017 jylǵy mamyrǵa deiin Qaraǵandy oblysy Saran qalasynyń ákimi bolǵan. Keiin Qaraǵandy oblysy ákiminiń energetika, turǵy úi-kommýnaldyq sharýashylyq jáne tótenshe jaǵdailar máseleleri boiynsha orynbasary bolyp istegen.
