Baqytgúl Hamenova, foto: azh.kz
Búgin, 21 aqpanda Atyraý oblystyq sotynyń apelliatsiia alqasy Abai Qunanbaiulyna eskertkish ornatý úshin 4,5 mln teńge para aldy dep aiyptalyp, 7 jylǵa sottalǵan oblys ákiminiń burynǵy orynbasary, eks-depýtat Baqytgúl Hamenovaǵa birinshi instantsiia soty shyǵarǵan úkimdi kúshinde qaldyrdy. Hamenovamen birge aiyptalǵan Atyraý oblystyq mádeniet basqarmasynyń burynǵy jetekshisi Aqylbek Rysqaliev pen "Balqytý" kompaniiasynyń direktory Ómirtai Adamovqa berilgen jaza merzimi azaityldy, dep habarlaidy "Ult aqparat" Azattyq radiosyna silteme jasap.
Úsheýine úkim byltyr 15 qarashada shyqqan. Atyraý qalalyq №2 soty Hamenovany 7 jylǵa bostandyǵynan aiyryp, kámeletke tolmaǵan eki balasy baryn eskerip, jazany 3 jyldan soń óteýge mindettegen. Hamenovaǵa "para berdi" delingen kásipker Adamov 4 jylǵa, ekeýiniń ortasynda "deldal bolǵan" mádeniet basqarmasynyń burynǵy jetekshisi Rysqaliev 7 jylǵa sottalǵan.
Úsheýi de memlekettik laýazymdy qyzmet atqarý quqyǵynan ómir boiyna aiyryldy. Sot úkiminde Baqytgúl Hamenovanyń múlkin tárkileý, ózin "Qurmet" ordeninen aiyrý týraly usynys engizilgen. Sottalǵan úsheý úkimge kelispei, ózderin aqtaýdy surap, apelliatsiiaǵa shaǵym túsirgen.
Búgin Atyraý oblystyq soty apelliatsiia alqasynyń tóraǵasy Tátti Ýálieva sot qaýlysyn oqyp bolǵan soń, Hamenovaǵa shyǵarylǵan úkimdi ózgertýge jáne onyń kúshin joiýǵa eshqandai negiz joǵyn túsindirdi. Ol apelliatsiia soty zerttegen dáleldemeler Rysqalievtiń para alýyna Hamenovanyń (ol oǵan baǵynyshty bolǵan) tapsyrmasy yqpal etkenin anyqtaǵanyn aitty. Odan bólek, Rysqaliev Hamenovanyń para alýy úshin jaǵdai jasaǵany da aitylady.
"Ol Adamovpen tyǵyz bailanysta bolyp, eskertkishti ornatý úshin aqshalai qarajat bólý turǵysynan qalalyq mádeniet bóliminiń basshysymen jáne býhgalterimen kelissóz júrgizip, shart jasasý protsesin jedeldetý, eskertkishti ornatýǵa biýdjetten qarjy alý, sondai-aq bólingen qarajatty JShS shotyna aýdarý jóninde sharalar qabyldaǵan" deidi Ýálieva.
Onyń sózinshe, "4,5 mln teńge para Hamenovaǵa arnalǵan, Rysqalievtiń atalǵan somadan úles alýy kelisilmegen".
Sol sebepti Rysqalievtiń qylmystyq áreketteri "para alýǵa járdemdesý" retinde qaita saralandy. Onyń jaýapkershiligin edáýir jeńildetetin erekshe jaǵdailardy eskere otyryp, sot alqasy "qylmystyq quqyqbuzýshylyqtyń ashylýyna yqpal etti, qylmystyq quqyqbuzýshylyqtyń basqa da qatysýshylaryn áshkereledi" degen negizben jáne asyraýynda tórt jas balasy baryn eskerip, Rysqalievtiń jazasyn 2 jylǵa bostandyǵynan aiyrý dep ózgertti. Al Adamovtyń zeinet jasynda ekeni (65 jasta) jáne asyraýynda bala kezinen múgedektigi bar eki uly men kelinderi jáne kámeletke tolmaǵan jeti nemeresi baryn eskerip, ony 1 jyl 6 aiǵa sottady. Rysqaliev pen Adamov jazasyn qamaýda óteidi.
Baqytgúl Hamenova apelliatsiia sotynyń qaýlysyna kelispeitinin jáne kassatsiialyq shaǵym túsiretinin aitty.
"Búginde qarǵa qarǵanyń kózin shuqyǵan joq. Óńirdegi sýdialardyń derbes sheshim, ádil úkim shyǵarýda eshqandai biligi joq ekendigine kóz jetti. Óńirdegi quqyq qorǵaý organdaryna seniń aqiqatyńnyń quny kók tiyn. Meniń esh kinám joq. Ony bári biledi. Endigi úmit tek Joǵarǵy Sotta. Adamnyń sotynan qutylǵanmen, Allanyń sotynan eshkim qutylmaidy. Men ózimniń shyndyǵymdy, aqtyǵymdy dáleldeý úshin barlyq tetikti paidalanyp, sońyna deiin kúresemin", - dedi Baqytgúl Hamenova jýrnalisterge bergen suhbatynda.
Eske sala keteiik, Atyraý oblysy ákiminiń orynbasary qyzmetin atqarǵan Baqytgúl Hamenova men Atyraý oblystyq mádeniet basqarmasynyń burynǵy basshysy Aqylbek Rysqaliev Atyraý qalasynda Abai eskertkishin ornatý boiynsha 145 million teńge somasyna "memlekettik satyp alý shartyn jasaǵany úshin adamdar tobymen aldyn ala sóz bailasý arqyly JShS basshysynan 4,5 million teńge para aldy" degen kúdikke ilingen edi.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
video: halyq-uni.kz
