©Sputnik / Timýr Batyrshin
Petropavl qalasynyń eki turǵyny áleýmettik jelide Soltústik Qazaqstandy Reseige qosýǵa usynys jasaǵany úshin bes jylǵa bas bostandyǵynan aiyryldy, dep habarlaidy Sputnik Qazaqstan agenttigi.
Sotqa erli-zaiyptynyń zańsyz áreketine qatysty is túsken. Ekeýi Qylmystyq kodekstiń 180-baby (Separatistik áreket), atap aitqanda, Qazaqstan Respýblikasynyń birtutastyǵy men tutastyǵyn, onyń aýmaǵyna qol suǵylmaýyn jáne bólinbeýin buzýdy ne memleketti ydyratýdy nasihattaý nemese oǵan jariia túrde shaqyrý, sol siiaqty osyndai mazmundaǵy materialdardy taratý maqsatynda daiyndaý, saqtaý nemese taratý boiynsha jaýapqa tartyldy.
Sot materialdaryna sáikes, olar "Chat Rýletka" qosymshasyna kirip, Soltústik Qazaqstan oblysyn Resei Federatsiiasyna qosýǵa úndegen. Osy tanymal servistiń negizinde beinebailanys arqyly álem boiynsha kez kelgen jeli qoldanýshysymen sóilesýge bolady.
"Erli-zaiypty kinási is materialdarymen rastalyp otyr. Ózderi kinásin moiyndaǵan joq. Degenmen zańsyz áreketi dáleldendi. Beinejazba da bar. Ol jerde qylmystyq tártip buzýshylyq tirkelgen. Keshendi psihologiialyq-filologiialyq saraptama jasaldy", - dedi Soltústik Qazaqstan oblystyq sotynyń baspasóz qyzmeti.
Prokýror árbir sottalýshyny 5 jylǵa bas bostandyǵynan aiyrýdy suraǵan. Al erli-zaiypty kinásin moiyndamai, ózderin aqtaýǵa ótinish jasady. Zań boiynsha ondai tártip buzýshylyq ekstremistik qylmystarǵa jatady. Ol úshin bes jyldan on jylǵa deiin bas bostandyǵynan aiyrýy jazasy qarastyrylǵan.
Al Qylmystyq kodekstiń 63-baby, 6-bóligi boiynsha ekstremistik qylmys jasaǵan adamǵa shartty jaza qoldanylmaidy.
"Osyny eskere otyryp, sot sottalýshylarǵa minimaldy jazany taǵaiyndap, árbireýin bes jylǵa bas bostandyǵynan aiyrýǵa sheshim shyǵardy. Olar óz jazasyn qaýipsizdigi ortasha mekemede óteidi", - delingen sot habarlamasynda.
Erli-zaiyptynyń jazasyn jeńildetetin jáne aýyrlatatyn mán-jailar anyqtalǵan joq.
