Soltústik Qazaqstan oblysynda tótenshe jaǵdai kezeńinde kommýnaldyq qyzmetterdiń tarifi tómendedi, dep habarlaidy "Ult aqparat".
Tabiǵi monopoliialardy retteý komitetiniń SQO boiynsha departamentiniń málimetinshe, Prezident Q.K. Toqaevtyń tapsyrmasyna orai óńirdegi kommýnaldyq qyzmet kórsetetin tabiǵi monopoliialar sýbektileri qyzmet qunyn arzandatty.
«Qoǵamda turaqtylyqty qamtamasyz etýdiń mańyzdylyǵyn eskerip, osyndai qiyn jaǵdaida turǵyndarǵa qarjylyq salmaqty azaitý maqsatynda kommýnaldyq qyzmet kórsetetin kásiporyndar saralaý boiynsha tarifterdi tómendetýge sheshim qabyldady. Iaǵni turǵyndar úshin kommýnaldyq aqy mólsheri 1 sáýirden bastap 10% deiin azaisa, al biýdjettik uiymdar úshin júkteme qaita bólinedi», - deidi Tabiǵi monopoliialardy retteý komitetiniń SQO boiynsha departamentiniń jetekshisi Abai Balabekov.
Petropavlda «Qyzyljar sý» kásiporny 10%-ke: turǵyndardy sýmen qamtý qyzmetiniń 1 tekshe metri úshin 81,25 teńgeden 73,12 teńgege deiin azaitty. Al sý tartý qyzmeti 74,94 teńgeden 67,44 teńgege deiin tómendedi.
«SevKazEnergosbyt» JShS Petropavl qalasy, Shal aqyn, Aqqaiyń, M.Jumabaev, Qyzyljar, Mamliýt, Esil, Jambyl jáne Timiriazev aýdandary úshin elektr qýaty tarifin 5% tómendetti. turǵyndar saǵatyna 1kVt úshin endi 12,32 teńgeniń ornyna 11,70 teńge tóleitin bolady.
«SoltústikEnergoOrtalyq» Ǵ.Músirepov, Aiyrtaý, Taiynsha, Aqjar jáne Ýálihanov aýdandarynda elektr energiiasy tarifin 14,35 teńgeden 12,91 teńgege deiin nemese 10% túsirdi.
