Búgin Úkimet otyrysynda QR Eńbek jáne halyqty áleýmettik qorǵaý ministri Serik Shápkenov Soltústik Qazaqstan oblysynda qansha jumys orny qurylatynyn aitty, dep habarlaidy QazAqparat.
«Soltústik Qazaqstan oblysynyń 2021-2025 jyldarǵa arnalǵan áleýmettik-ekonomikalyq damýynyń keshendi josparynda óńirge investitsiialar men bilikti mamandardy tartýǵa, jańa óndiris kózderi men jumys oryndaryn ashýǵa baǵyttalǵan naqty is-sharalar qarastyrylǵan. 2025 jylǵa deiin óńirde 97 myń, onyń ishinde memlekettik baǵdarlamalar men jeke kásipkerlerdiń bastamamalary boiynsha 71 myń jańa jumys ornyn qurý josparlanǵan. Sondai-aq keshendi jospar aiasynda iske asyrylatyn jobalar boiynsha 16 myń turaqty jáne 10 myń ýaqytsha jumys orny qurylady. Barlyǵy 69 myń turaqty jumys orny ashylady», - dedi ministr.
Onyń sózine qaraǵanda, eńbek resýrstarynyń utqyrlyǵyn arttyrýdy yntalandyrýǵa, demografiialyq teńgerimsizdiktiń jáne keri kóshi-qon saldosynyń áserin azaitýǵa baǵyttalǵan birqatar jumystar atqarylady.
«Birinshiden, biznes protsesti ońtailandyrý úshin bos jumys oryndary týraly málimetterdi alý, qonys aýdarýǵa ótinim berý jáne qabyldanǵan sheshimmen tanysý elektrondy eńbek birjasy arqyly júzege asyrylatyn bolady. Ekinshiden, qonys aýdarýshylardy jumyspen qamtýǵa, jańa jerde beiimdeýge jaǵdai jasaý úshin kóshýge beriletin bir rettik járdemaqy mólsherin kóbeitý boiynsha jumystar júrgizilip jatyr», - dedi S. Shápkenov.
Onyń sózine qaraǵanda, jumys berýshilerdi yntalandyrý maqsatynda qonys aýdarýshylardyń eńbekaqysynyń bir bóligin sýbsidiialaý, oqytý shyǵyndaryn óteý boiynsha sharalar qabyldanady.
«Jalpy, keshendi josparda qarastyrylǵan is-sharalar 2025 jylǵa óńirge 10 myńnan astam jumys kúshin kóshirýge, demografiialyq máselelerdiń jaqsarýyna oń áserin tigizedi. Sonymen qatar, jumyssyzdyq deńgeiin 4,9 paiyzǵa deiin azaitýǵa múmkindik beredi», - dedi ministr.
