Qazaqstan Qarýly kúshteriniń áskeri borty Uly Otan soǵysy jyldarynda qaza tapqan qazaqstandyq jaýyngerler – Nikolai Matveevich Gýrovtyń, Tólegen Úrkerbaevtyń jáne Petr Abramovich Fomenkonyń súiekterin Máskeýden Nur-Sultanǵa jetkizdi, dep habarlaidy "Ult aqparat" Qorǵanys ministrliginiń baspasóz qyzmetine silteme jasap.
Rásim barysynda Qorǵanys ministri, general-polkovnik Rýslan Jaqsylyqov Uly Otan soǵysynda qaza tapqan qazaqstandyq jaýyngerlerdiń súiekterin izdestirýge belsene qatysqandardyń bárine rizashylyǵyn jetkizip, alǵysyn bildirdi.
– Surapyl soǵystan oralmai, habar-osharsyz ketken sarbazdar men ofitserlerdiń urpaqtary áli kúnge deiin babalary jaily habar kútedi. Soǵysta qaza tapqan sońǵy sarbaz jerlengenge deiin izdeý jalǵasa bermek, – dedi qorǵanys vedomstvosynyń bastyǵy. – Biz birlesip atqaryp jatqan jumys jastarǵa áskeri-patriottyq tárbie berýge, qazaqstandyq jaýyngerlerdiń janqiiarlyǵy men batyldyǵy týraly tarihty jadymyzda saqtaýǵa barynsha yqpal eterine senimdimin.
Qaza tapqan jaýyngerlerdiń súiekterin jetkizý "Atamnyn Amanaty" qoǵamdyq uiymynyń arqasynda uiymdastyryldy. Bul uiym Qazaqstannan Uly Otan soǵysyna attanyp, qaza tapqan jáne habarsyz ketken sarbazdardyń jerlengen jerin anyqtaý boiynsha muraǵattyq-izdestirý jumystarymen ainalysady.
– Surapyl soǵystyń bastalǵanyna seksen jyldan astam ýaqyt ótti. Bizdiń uiym bul rette muraǵat derekterin jinaýda tynymsyz jumys istep keledi. Jeńis jolynda bizdiń jarqyn bolashaǵymyz úshin qaza tapqandardyń esimderi anyqtalyp, olar izdeýshilermen únemi bailanysta bolady, – dedi "Atamnyn Amanaty" basqarmasynyń tóraǵasy Murat Moldaǵaliev.
Qazirgi ýaqytta Petr Abramovich Fomenko – Qostanai oblysy Altynsarin aýdanynyń Sherbakovka aýylynan, Úrkerbaev Tólegen – Almaty oblysynyń Uzynaǵash kentinen, Gýrov Nikolai Matveevich – Almaty qalasynan ekeni naqtylandy.
Atalǵan óńirlerde jaýyngerlerdiń súiekterin qarsy alý, týystaryna berý jáne áskeri qurmet kórsetilip, qaita jerleý rásimderi ótedi.
