QR Premer-Ministri Álihan Smaiylov Taldyqorǵan qalasyna baryp, Jetisý oblysynyń barlyq deńgeidegi máslihat depýtattarynyń jinalysyna qatysty, dep habarlaidy "Ult aqparat" primeminister.kz saityna silteme jasap.
Depýtattar aldynda sóz sóilegen Álihan Smaiylov Memleket basshysynyń Jarlyǵymen Jetisý oblysynyń qurylǵanyn eske salyp, óńir jurtshylyǵyn osynaý tarihi oqiǵamen quttyqtady.
Úkimet basshysy depýtattarǵa QR Prezidentiniń Jetisý oblysynyń ákimi laýazymyna Beibit Isabaev pen Baǵdat Qarasaevtyń kandidatýralaryn qaraýǵa engizý týraly hatyn oqyp berdi.
Álihan Smaiylov olardyń árqaisysynyń óńirdi basqarý úshin tájiribesi mol jáne uiymdastyrýshylyq qabiletteri jetkilikti ekenin atap ótti.
Ashyq daýys berý qorytyndysy boiynsha 141 depýtattyń 106-sy Beibit Isabaevtyń kandidatýrasyna, 35 depýtat Baǵdat Qarasaevqa daýys berdi.
Jiyn aiaqtalǵannan keiin QR Premer-Ministri óńir aktivine oblys ákimin tanystyrdy.
Premer-Ministr óz sózinde oblys basshylyǵynyń aldynda memlekettik qyzmetter kórsetetin basqarý organdary men mekemeleriniń turaqty jumysyn qamtamasyz etýdi jedel túrde sheshý mindeti turǵanyn atap ótti.
Budan bólek, azamattardyń ál-aýqaty men ómir súrý sapasyn arttyrý úshin óńirdi ekonomikalyq damytý boiynsha jumysty josparly túrde júrgizý qajet.
Osy turǵyda Premer-Ministr aýyl sharýashylyǵy óndirisin, óńdeý ónerkásibin jáne týrizm salasyn keleshegi bar baǵyttar dep atady.
«Óńir ekonomikasynyń myqty jaqtaryn taldap, Jetisýdyń jyldam damýyna serpin beretin investitsiialyq jobalardy anyqtaý qajet», — dedi Álihan Smaiylov.
Sondai-aq Úkimet basshysy jergilikti turǵyndardyń ózekti áleýmettik máselelerin, sonyń ishinde sapaly aýyz sýmen, turǵyn úimen, elektrmen jáne gazben jabdyqtaýdy, sondai-aq joldar men qoǵamdyq nysandardy ýaqytyly jóndeýdi sheshýdiń mańyzdylyǵyn atap ótti.
«Óńir turǵyndarynyń áleýmettik máselelerin sheshý jergilikti atqarýshy organdar úshin birinshi orynda bolýy tiis. Bul oraida olardyń jumysy halyqpen nátijeli dialog negizinde qurylyp, Memleket basshysynyń “Jańa Qazaqstan” saiasatyna sáikes tapsyrmalaryn iske asyrýǵa baǵyttalýy tiis», — dep túiindedi Álihan Smaiylov.
