Ekaterinbýrg qalasyna jumys saparymen barǵan QR Premer-Ministri Álihan Smaiylov reseilik iri kompaniialardyń basshylarymen kezdesti. Bul týraly Úkimettiń baspasóz qyzmeti habarlady.
«KAMAZ» JAQ bas direktory Sergei Kogoginmen kezdesý barysynda jańa jobalardy iske asyrý, jabdyqtardy jetkizý jáne kommertsiialyq tehnikaǵa qyzmet kórsetý ortalyqtaryn iske qosý máseleleri talqylandy.
Sergei Kogogin Úkimet basshysyna kompaniianyń qazirgi qyzmeti, birlesken jobalardy iske asyrý týraly habarlap, «KAMAZ» JAQ-tyń buryn alǵan barlyq mindettemelerdi oryndaýǵa daiyn ekendigine sendirdi.
QR Premer-Ministri «KAMAZ» kompaniiasymen birlesken jobalardyń Qazaqstan-Resei óndiristik kooperatsiiasy salasyndaǵy ózara is-qimyl baǵdarlamasy aiasynda iske asyrylyp jatqan alǵashqy jobalardyń biri ekenin atap ótti.
«Búginde Qostanai indýstriialyq aimaǵynyń alańynda shoiyn qorytý zaýytynyń jáne júk kólikteriniń qosalqy bólshekterin shyǵaratyn zaýyttyń qurylysy júrip jatyr. Bul ekologiia salasyndaǵy úzdik tájiribeler men standarttardy eskere otyryp jasalǵan joǵary tehnologiialyq zamanaýi óndiris bolmaq», — dedi Álihan Smaiylov.
Budan basqa, kompaniia júk tehnikasy ótetin jetekshi kópirlerdiń tirekterin lokalizatsiialaý deńgeiin arttyrý boiynsha taǵy bir iri jobany ázirlep jatyr.
«Bul jobalardyń ekonomikalyq jáne áleýmettik áseri mol. Birlesken kúsh-jigerdiń arqasynda olardyń tabysty ári ýaqytyly iske asyrylatynyna senimdimin», — dedi QR Premer-Ministri.
Álihan Smaiylov Qazaqstanda qolaily biznes júrgizý úshin barlyq qajetti jaǵdailar jasalǵanyn atap ótti. Arnaiy ekonomikalyq jáne indýstriialyq aimaqtar tiimdi jumys istep, damý institýttary jeńildikpen nesie beredi jáne lizingtik qarjylandyrýdy júzege asyrady, sondai-aq investorlar úshin memlekettik qoldaý sharalary men preferentsiialar zańnamalyq túrde bekitilgen.
«Rýsskaia mednaia kompaniia» prezidenti Vsevolod Levinmen bolǵan kezdesýde taý-ken metallýrgiia salasynda jańa jobalardy iske asyrý máseleleri talqylandy.
Máselen, «Aqtóbe mys kompaniiasy» 2024 jylǵa deiin shamamen 190 mlrd teńgege jerasty kenishterin salý boiynsha 4 jobany iske asyrýdy josparlap otyr.
V. Levin RMK-nyń Aqtóbe oblysyndaǵy óndiristik qyzmeti, sondai-aq Jetisý oblysyndaǵy «Kóksai» jáne Abai oblysyndaǵy «Aidarly» ken oryndarynda jobalardy iske asyrý josparlary týraly aityp berdi.
Úkimet basshysy «Kóksai» jáne «Aidarly» ken oryndaryn igerýdiń elimiz úshin úlken mańyzǵa ie ekenin atap ótti. Ol Qazaqstannyń tek óndirýge ǵana emes, sondai-aq shikizatty odan ári qaita óńdeýge jáne qosylǵan quny joǵary ónim óndirýge de múddeli ekenin atap ótti.
«Úkimet jer qoinaýyn paidalanýshy iri kásiporyndardyń ainalasynda óńdeý ónerkásibinde shaǵyn jáne orta biznesti damytý boiynsha jumys júrgizip jatyr. «Rossiiskaia mednaia kompaniia» bul bastamany qoldap, osy baǵytta belsendi túrde jumys isteidi dep senemin», — dep túiindedi Álihan Smaiylov.
