Qazaqstan Respýblikasynyń Premer-Ministri Álihan Smaiylov Resei Federatsiiasy Úkimetiniń Tóraǵasy Mihail Mishýstinmen telefon arqyly sóilesti, dep habarlaidy primeminister.kz.
Resei Federatsiiasy Úkimetiniń Tóraǵasy M. Mishýstin Á. Smaiylovty Qazaqstan Respýblikasynyń Premer-Ministri laýazymyna taǵaiyndalýymen quttyqtady.
Taraptar strategiialyq áriptestikti ekijaqty jáne kópjaqty formatta odan ári nyǵaitýǵa ázir ekendikterin bildirdi.
«Qazaqstan Úkimeti Resei Federatsiiasymen strategiialyq seriktestikti tereńdetý baǵytyn berik ustanady. Sizben birge ekijaqty kún tártibiniń barlyq salasy boiynsha Qazaqstan-Resei qarym-qatynasyna tán mazmundy jáne turaqty dialogty ári qarai jalǵastyra beremiz dep úmittenemin. Biz buǵan deiin qol jetkizilgen ýaǵdalastyqtardy júzege asyrýǵa barynsha daiynbyz», — dedi Smaiylov.
Eýraziialyq ekonomikalyq odaq aiasyndaǵy ekijaqty saýda-ekonomikalyq yntymaqtastyq jáne ózara is-qimyl máseleleri talqylandy.
Resei – Qazaqstannyń negizgi saýda-ekonomikalyq seriktesi. Osy jyldyń 10 aiynyń qorytyndysy boiynsha QR men RF arasyndaǵy taýar ainalymynyń kólemi 30%-ǵa artyp, $19,5 mlrd-qa jetti. Bul rette saýda qurylymyn ártaraptandyrýda ilgerileýshilik baiqalyp otyr – Qazaqstannyń eksport kólemi 39,4%-ǵa, onyń ishinde óńdelgen ónim eksporty 47,7%-ǵa ósti. 2019 jylǵy pandemiiaǵa deiingi kezeńmen salystyrǵanda saýda kólemi de 21%-dan astamǵa ósti.
