Foto: gov.kz
Premer-ministr Álihan Smailov qytailyqtarǵa jer berýge qatysty qaýesetti joqqa shyǵardy, dep habarlaidy Sputnik Qazaqstan.
Búgin senatta ótken brifingte jýrnalister Batys Qazaqstan turǵyndaryn alańdatqan másele týraly suraq qoidy.
“Aqjaiyq óńirinde halyq qytailyqtarǵa jer berýge qarsylyq bildirip, jappai úndeý joldap jatyr. Ótken aptada Astanaǵa kelgen oblys ákimi Nariman Tóreǵaliev qytailyqtarmen kelisim júrip jatqanyn jáne aqbókenderdiń etin óńdeitin zaýyt salynatynyn aitty. "Halyq qoryqpasyn, jumys beriledi" dedi. Alaida halyq qarsy, jergilikti turǵyndar qarsy bolyp turǵanda bul sheshim qabyldana ma?”, - dedi jýrnalister.
Óz kezeginde Premer-ministr sheteldikterge eshqandai jer berilmeitinin erekshe atap ótti. Bul - zań talaby.
“Qazaqstannyń Jer kodeksinde sheteldikterge, sheteldik kompaniialarǵa nemese sheteldikterdiń qatysýymen jumys istep jatqan qazaqstandyq kompaniialarǵa aýyl sharýashylyq jerlerin menshikke de, jai paidalanýǵa berýge de tyiym salynǵan. Mundai quqyq tek Qazaqstan halqynda ǵana bar. Sondyqtan sheteldikterge jer berý siiaqty eshqandai másele qaralyp jatqan joq, qaralmaidy da. Bul - bizdiń ustanymymyz ”, - dep atap kórsetti Smailov.
Osy oraida Úkimet basshysy Prezidenttiń de jer máselesine qatysty óz pikirin aitqanyn eske saldy. Al Batys Qazaqstandaǵy áńgimeler kelissózder kezinde kóterilgen, biraq naqty qolǵa alynbaǵan.
“Ol aqparat durys emes. Keibir investorlar óz usynystaryn ǵana aitqan. Bul - tek áńgime, ary qarai eshqandai kelisimder jasalǵan joq, jasalmaidy da”, - dedi Smaiylov.
