Eýraziialyq ekonomikalyq odaq naryǵynda qazaqstandyq taýarlardyń eksportyna kedergi keltirip turǵan 70-ke tarta shekteý bar. Mundai málimetti búgin elordada ótken Saýda jáne integratsiia ministrliginiń keńeitilgen otyrysynda Premer-Ministrdiń birinshi orynbasary – Qarjy ministri Álihan Smaiylov aitty, dep habarlaidy QazAqparat.
«Buǵan deiin aitylǵandai, memlekettiń qoldaýyna qaramastan shikizattyq emes eksporttyń ósimi óte baiaý. Bul rette, EAEO aiasyndaǵy integratsiia týraly aityp ótkim keledi. Ókinishke qarai, otandyq taýarlar bizdiń seriktes-memleketterdiń naryǵynda kedergilermen betpe-bet kelip otyr. Búgingi tańda dál mundai 70-ke tarta kedergi men shekteý bar. Bul máseleni barlyq alań men deńgeide, EAEO keńesinde de, Memleket basshylarynyń deńgeiinde de kóterip kelemiz. Biraq, ókinishke qarai, bul kedergiler áli de saqtalyp otyr. Keibir salada alǵa jyljý bar desek te, kedergilerdiń birazy boiynsha naqty bir sheshimniń qabyldanǵaly otyrǵanyn kórmei otyrmyz», - dedi Álihan Smaiylov.
Birinshi vitse-premerdiń aitýynsha, otandyq biznestiń múddesin qorǵaý úshin importtyq taýarlarǵa qatysty «aina sipatyndaǵy qorǵaý sharasyn» qolǵa alý kerek.
«Meniń oiymsha, osy sharany qolǵa alsaq, ádilettilikke jeter edik. Máselen, naqty sandarmen sóileitin bolsaq, Qazaqstannyń EAEO elderimen ózara saýda-sattyǵynda 30 paiyzdyq eksport pen 70 paiyzdyq importqa ie bolyp otyrmyz. Iaǵni, saiyp kelgende biz seriktesterimizden qaraǵanda ishki naryqty ashý integratsiiasy jaǵynan alǵa jyljyp kettik. Sol sebepti, menińshe, «aina sipatyndaǵy sharalarǵa» qatysty oilanatyn kez jetti. Baqyt Sultanovtan (Saýda jáne integratsiia ministri) bul turǵyda naqty usynys kútemin», - dedi Álihan Smaiylov.
