Beisenbi, 7 shildede Premer-Ministr Álihan Smaiylov kásipkerlik qyzmette «taza paraqtan bastap» retteýdi engizý jáne memlekettik baqylaý men qadaǵalaýdy avtomattandyrý máseleleri jóninde keńes ótkizdi, dep habarlaidy "Ult aqparat" primeminister.kz saityna silteme jasap.
Keńes barysynda ulttyq ekonomika ministri Álibek Qýantyrov qoǵamdyq tamaqtaný, saýda, qonaq úi qyzmetteri, kólik jáne aýyl sharýashylyǵy salalaryndaǵy retteýshi aktilerge júrgizilgen taldaýdyń bazalyq sharttarǵa sáikes kelmeitin basy artyq jáne birin-biri qaitalaityn birqatar talaptardy anyqtaǵanyn málimdedi.
Aldaǵy ailarda taǵy alty baǵyt boiynsha, aqparat jáne bailanys, kompiýterlik baǵdarlamalaý salasy, jyljymaityn múlikpen jasalatyn operatsiialar, jinaqtaý, taý-ken ónerkásibi jáne qubyr kóliginiń qyzmetine taldaý júrgizý josparlanýda.
Premer-Ministr qazirgi ýaqytta bizneske kóptegen formaldy talaptar qoiylǵanyn atap ótti. Olardy tiisti baqylaýdy qamtamasyz etýge ziian keltirmeitindei etip alyp tastaýǵa bolady.
Álihan Smaiylov mundai talaptardyń bolýy eldegi iskerlik ahýalǵa keri áserin tigizetinin, sondyqtan ortalyq memlekettik organdardyń «Atameken» UKP-men birlesip, retteýshi aktilerdi qysqartý boiynsha jumys júrgizýi tiis ekenin atap ótti.
«Memleket basshysy bizdiń aldymyzǵa bizneske kóbirek erkindik berý mindetin qoidy. Bul – jańa ekonomikalyq saiasatty qalyptastyrý aiasyndaǵy Úkimet jumysynyń basty baǵyttarynyń biri. Tekserýshi organdardyń formaldy belgilerine qarap biznesti jaýapkershilikke tartýǵa múmkindigi bolmaýy tiis», — dedi Álihan Smaiylov.
Osyǵan bailanysty Premer-Ministr tiisti organdarǵa qaita qaraý jáne qysqartý arqyly qazaqstandyq normativtik-quqyqtyq bazany basy artyq talaptardan tazartý jónindegi jumysty jandandyrýdy tapsyrdy.
Sondai-aq Álihan Smaiylov Tsifrlyq damý, innovatsiialar jáne aeroǵarysh ónerkásibi ministrliginiń memlekettik baqylaý men qadaǵalaýdy qamtamasyz etý kezinde táýekelderdi basqarýdyń avtomattandyrylǵan júiesin qurý boiynsha tásilderin maquldady.
«Tekserýshi vedomstvolar buzýshylyqtardyń qaýpi joǵary bolǵan kezde áreket etýi tiis. Bizneske ákimshilik júktemeni azaitý jáne táýekelderdi basqarý júiesin iske qosý – júrgizilip jatqan reformadaǵy negizgi qadamdar. Ortalyq memlekettik organdardyń basshylaryna osy jumystyń nátijeleri úshin jeke jaýapkershilik týraly taǵy da eskertemin», — dep túiindedi Premer-Ministr.
