Úkimet basshysynyń birinshi orynbasary Álihan Smaiylov elimizde salynatyn jańa mektepterge qatysty túsinik berdi, dep habarlaidy QazAqparat.
«1000 mekteptiń qurylysy boiynsha problemalyq máselelerge qatysty sizderdiń depýtattyq saýaldaryńyzǵa mynany habarlaimyn. Qazirgi kezde Memleket basshysynyń tapsyrmasyna sáikes 2025 jyldyń sońyna deiin keminde 1000 mektep salý boiynsha óńirler bólinisinde jol kartasy ázirlenýde. 2021 jyly 1000 mekteptiń 200-in, onyń ishinde nysanaly qurylys esebinen 163 mektepti, jan basyna qarjylandyrý tetigi esebinen 31 jekemenshik mektepti, memlekettik-jekeshelik áriptestik (MJÁ) aiasynda 6 mektepti paidalanýǵa berý josparlanǵan», - delingen Á. Smaiylovtyń depýtattyq saýalǵa bergen jaýabynda.
Onyń aitýynsha, Mektepterdiń nysanaly qurylysyna 2021 jyly jalpy sipattaǵy transferttermen jergilikti atqarýshy organdarǵa 95,7 mlrd teńge berildi. Qosymsha, 2021 jyly «Jumyspen qamtýdyń 2020-2021 jyldarǵa arnalǵan jol kartasy» baǵdarlamasynyń aiasynda 65 mekteptiń qurylysyna 40,1 mlrd teńge kózdelgen.
«2021 jylǵy 1 qazandaǵy jaǵdai boiynsha 165 mektep (56 myń oqýshy ornyna) paidalanýǵa berildi, onyń ishinde 52 nysanaly qurylys esebinen, 112 (36 myń orynǵa) jekemenshik mektep, 1 (2 myń orynǵa) MJÁ esebinen. Bilim jáne ǵylym ministrliginiń aqparatyna sáikes, jyl sońyna deiin barlyǵy 311 mektep paidalanýǵa beriletin bolady, onyń ishinde 145 mektep memlekettik biýdjet esebinen, 4 mektep MJÁ esebinen, 162 jekemenshik.Sonymen qatar, qazirgi kezde ministrlik bilim berý uiymdaryn jabdyqtarmen jáne jihazben jaraqtandyrý normalaryna ózgerister men tolyqtyrýlardy ázirlep jatyr. Onda jalpy bilim berýdiń bastapqy satysyn keńistik-damytý ortasyn qurý jónindegi jabdyqpen, múmkindikteri shekteýli balalardyń oqý ornyn uiymdastyrý úshin jeke kompensatorlyq, qosalqy, tehnikalyq quraldarmen qamtamasyz etý qarastyrylǵan», - dedi Úkimet basshysynyń birinshi orynbasary.
Onyń sózshine qaraǵanda, QR Biýdjet kodeksine sáikes, respýblikalyq jáne oblystyq biýdjetter, respýblikalyq mańyzy bar qalalar, astana biýdjetteri arasyndaǵy jalpy sipattaǵy transfertterdiń kólemi úsh jyl ishinde ózgertýge jatpaidy. 1000 mekteptiń qurylysy aiasynda MJÁ tetigin qoldaný arqyly 101 mekteptiń qurylysy qamtamasyz etiledi.
Eske sala keteiik, biyl qazan aiynda Parlament Májilisiniń jalpy otyrysynda depýtat Juldyz Súleimenova jańa mektepter qurylysyna kedergi bolatyn túiindi máselelerdi kóterdi.
Osy oraida depýtat QR Premer-Ministriniń birinshi orynbasary Álihan Smaiylovtyń atyna saýal joldady.
