Seisenbi, 12 shildede QR Premer-Ministri Álihan Smaiylov Ýimbldon týrnirinde tarihi jeńiske jetken qazaqstandyq tennisshi Elena Rybakinamen kezdesti, dep habarlaidy "Ult aqparat" primeminister.kz saityna silteme jasap.
Úkimet basshysy Elena Rybakinaǵa QR Prezidentiniń Jarlyǵymen sporttaǵy asa úzdik jetistikteri jáne halyqaralyq yntymaqtastyqty damytýǵa qosqan úlesi úshin berilgen II dárejeli «Dostyq» ordenin tabys etti.
«Barlyq qazaqstandyqtar Sizdiń álemniń eń ataqty tennisshilerimen saiystaryńyzdy baqylap otyrdy. Úlken dýlyǵa týrnirinde jeńiske jetip, Siz otandastarymyzdyń úmitin aqtadyńyz, sondai-aq Qazaqstanda tennisti dáripteýge baǵa jetpes úles qostyńyz. Sizdiń jeńisińiz jas sportshylardy yntalandyra túsedi dep senemin», — dedi Álihan Smaiylov.
Óz kezeginde Elena Rybakina joǵary marapat úshin alǵysyn bildirip, qazaqstandyqtardyń qoldaýyn sezinip júretinin aitty.
«Árine, men otandastarymyzdyń qoldaýyn udaiy sezinemin. Bul men úshin úlken qýanysh pen jaýapkershilik. Keshe Qazaqstanǵa ushyp kelgende meni qarsy alǵan adamdardyń kóp bolǵanyn kórdim. Bul jaǵdaidyń meniń basymnan ótip jatqanyna áli de sene alar emespin», — dedi ol Premer-Ministrmen kezdesýden keiin.
Qazaqstandyq tennisshi júlde qarajatynyń bir bóligin elimizde qaiyrymdylyqqa jáne iýniorlardy qoldaýǵa jumsaitynyn aitty.
«Meniń oiymsha, týrnir uiymdastyrǵan nemese jas oiynshylarǵa grant taǵaiyndaǵan durys bolady. Sebebi men munda zor qoldaýǵa ie boldym. Endi jas býynnyń damýyna meniń kómektesetin kezegim», — dedi Elena Rybakina.
Sondai-aq sportshy qarajattyń bir bóligin janýarlarǵa kómektesýge jumsaýdy josparlap otyr.
«Birneshe kúnnen keiin AQSh-ta ótetin týrnirlerge daiyndala bastaimyn. Biylǵy maqsat – álemdik reitingtiń TOP-10 qataryna kirý. Basty maqsat – birinshi bolý. Men buǵan umtylamyn jáne bar kúsh-jigerimdi salamyn», — dedi Ýimbldon-2022 jeńimpazy.
