Serialdan alynǵan kadr
Oqý-aǵartý men Ǵylym jáne joǵary bilim ministrleri "jastar arasynda zorlyq-zombylyqty nasihattaǵany" úshin Qazaqstanda reseilik "Slovo patsana" serialyna tyiym salynýy múmkin be degen suraqqa jaýap berdi, dep habarlaidy Sputnik Qazaqstan.
Saiasat Nurbek serialǵa qatysty Reseidiń ózinde birneshe málimdeme jasalǵanyn atap ótti.
"Biz qazir osy máseleni zerdelep jatyrmyz, kúni buryn eshteńe aita almaimyz. Ministrlik óz tarapynan birneshe sarapshyny tartty, aqparat ministrligi de zerttep jatyr. Qajet bolǵan jaǵdaida qandai da bir sheshim qabyldanýy múmkin, biraq ázirge qatty dúrbeleń kórip turǵan joqpyz", - dedi ol Úkimette ótken brifingte.
Oqý-aǵartý ministri Ǵani Beisembaev ta másele zerdelenip jatqanyn aitty.
"Biz kez kelgen zorlyq-zombylyqqa qarsymyz, oǵan tózýge bolmaidy. Qazir osy másele zerdelenip jatyr. Meniń bilýimshe, óndirýshi el de muny qarastyryp jatyr", - dedi ol.
Eki ministr de reseilik serialdy áli kórmegen, aitýlarynsha, ýaqyttary bolmaǵan.
Aita keteiik, Reseilik "Slovo patsana. Krov na asfalte" serialy 1980 jyldardaǵy jastar arasyndaǵy qylmystyq toptar týraly baiandaidy.
Buǵan deiin Almaty oblysy Qarasai aýdanynyń politsiia basqarmasy reseilik serial jastarǵa keri áser etýi múmkin ekenin málimdedi.
Tártip saqshylary serial jasóspirimder men mektep ortasynda qylmystyq romantikany nasihattaidy, zorlyq-zombylyq, ishimdik ishý, dórekilik pen zańbuzýshylyqtyń kóptegen kórinisin qamtidy.
Qarasai aýdandyq politsiia basqarmasy ata-analar men mektep muǵalimderin osy serialdy kórgen soń, balalardy baqylaýda ustaýǵa shaqyrdy.
