Qazaq ánshisi Ernar Sadyrbaev "Slavian bazarynyń" finalynda frantsýz tilindegi óte kúrdeli ánderdiń birin oryndady.
Ánshiniń ónerine tánti bolǵan kórermender zor qoshemet kórsetti. Festivalge arnaiy kelgen otandastary tarapynan da úlken qoldaý boldy.
Ámire (ánshiniń shyǵarmashylyq laqap aty) án shyrqap bolǵan soń Qazaqstannyń týyn sahnada jelbiretýdi bala kezinen armandap júrgenin aitty. Al júrgizýshiler birden ánshige qoldaý kórsetip otyrǵan qazaqstandyqtardan týdy sahnaǵa berip jiberýdi surady. Osylaisha armanyna jetken Ernar Sadyrbaev Vitebsk turǵyndaryna jyly lebizin bildirip, alǵys aitty.
"Qazaqstan jáne Belarýs – máńgi dostar!", — dedi ol.
Aita keteiik, Qazaqstan men Rýmyniia konkýrsanttary birdei ball jinaǵan – 156. Alaida ádil qazylar alqasy bas júldeni Rýmyniia ánshisine berýdi uiǵardy. Qazaqstan – birinshi, Ýkraina – ekinshi oryn alsa, al úshinshi oryn Polsha men Belarýs daryndylaryna buiyrdy.
