Soltústik Qazaqstan oblysyna jyl basynan 2 myńnan astam adam qonys aýdarsa, osydan eki ese kóp adam kóship ketti, dep habarlaidy "Ult aqparat".
SQO Statistika departamentiniń málimetinshe, óńirge jyl basynan 2398 adam kóship kelgen. Alaida 4131 adam qonys aýdarǵan. Bul - 2019 jylǵy qańtar-maýsymǵa qaraǵanda 33,1% az. Migratsiialyq kemý 1 733 adamdy qurady.
«Oblys aýmaǵynan kóship ketkenderdiń 94,4%-y TMD elderine qonys aýdarsa, sondai-aq óńirge turýǵa kelgenderdiń 87,1%-y TMD elderiniń azamattary. SQO-dan shyqqan emigranttardyń negizgi bóligin - 98,9% Resei qabyldaidy. Oblysqa TMD elderinen kelgenderdiń arasynda da Resei kósh bastap tur, onyń úlesi 89,2%», - deidi SQO Statistika departamentiniń bas mamany Olga Býbenko.
Álemniń basqa elderine oblystyń 56 turǵyny qonys aýdardy, al 44 adam óńirge turaqty turýǵa keldi. Shetelge ketetinder negizinen Polsha jáne Germaniiany tańdaidy. Olarǵa basqa elderge ketkenderdiń 94,6%-y qonys aýdardy. Kóship kelgender arasynda Monǵoliia jáne Qytai turǵyndary basym, olardyń úlesi - 65,9%.
Aimaqaralyq migratsiia kemigen. Elimizdiń basqa oblystarynan 2058 adam kóship kelse, 3 134 adam qonys aýdardy. SQO-ǵa mekenjaiyn ózgertkenderdiń basym bóligi Aqmola oblysynyń jáne Nur-Sultan qalasynyń turǵyndary. Óńir turǵyndary da negizinen osy kórshi aimaqtarǵa qonys aýdarady eken.
