Soltústik Qazaqstan oblysyndaǵy eldi mekenderdiń birinde sintetikalyq esirtki jasaityn zerthana anyqtaldy, dep habarlaidy "Ult aqparat".
SQO politsiia departamenti baspasóz qyzmetiniń málimetinshe, esirtki qylmysyna qarsy is-qimyl basqarmasynyń qyzmetkerleri sintetikalyq esirtkini jasap, satýmen ainalysty degen kúdikpen otbasyny ustady.
Jedel-tergeý is-sharasy barysynda esirtki zattarynyń Petropavlda qoldan-qolǵa berilý arqyly satylyp, psihobelsendi esirtki preparattarynyń oblys ortalyǵynan 120 shaqyrym jerde jasalatyndyǵy anyqtaldy.
Jambyl aýdanyndaǵy eldi mekenderdiń birinde politseiler arnaiy jaraqtandyrylǵan zerthanany tapty. Munda sintetikalyq «tuz» jasaýǵa barlyq jaǵdai jasalǵan: nysan jeldetilip, túrli qajetti ydystar, tipti qorǵanysh kostiýmderi men respiratorlarǵa deiin bolǵan. Zańsyz kásipti azamattyq nekedegi erli-zaiypty jáne olardyń jaqyn týystary qurypty.
Operatsiia barysynda politseiler satýǵa býyp-túiilip ázirlengen 55 gr sintetikalyq esirtkini tapty. Sondai-aq zerthanadan oraýǵa arnalǵan zattar, uialy telefondar, dárihana tarazysy, arnaiy dápter jáne sintetikalyq esirtkige uqsas 700 gr untaq tabylyp, alyndy. Bul attardyń barlyǵy sot-himiialyq zertteýge jiberildi.
«Bul topty ustaý úshin ótken jyldyń qazan aiynan bastap orasan jumys júrgizildi. Qazir bul derek «Esirtki, psihotroptyq zattardy, sol tektesterdi ótkizý maqsatynda zańsyz daiyndaý, qaita óńdeý, iemdený, saqtaý, tasymaldaý, jóneltý ne ótkizý» baby boiynsha Sotqa deiingi tergep-tekserýlerdiń biryńǵai tilimine engizildi. Tórt kúdikti – eki er adam men eki áiel qamaýǵa alyndy. Tergeý júrip jatyr», - deidi SQO PD bastyǵynyń orynbasary Rýslan Nazarov.
Jyl basynan esirtki qylmysyna qarsy is-qimyl basqarmasynyń qyzmetkerleri zańsyz ainalymnan 17 kg túrli esirtki zatyn aldy. 31 esirtki qylmysy anyqtaldy. Osy qylmystarǵa qatysy bar 42 adam ustaldy.
