Soltústik Qazaqstan oblysynyń 2021-2025 jyldarǵa arnalǵan áleýmettik-ekonomikalyq damýynyń keshendi jospary óńirdiń infraqurylymyn jaqsartady. Bul týraly Premer-Ministr Asqar Mamin málim etti, dep habarlaidy "Ult aqparat".
«Memleket basshysynyń tapsyrmasymen Úkimet Soltústik Qazaqstan oblysynyń ákimdigimen birlesip, osy óńirdiń Áleýmettik-ekonomikalyq damýynyń keshendi josparyn jańartty. Qazirgi tańda, keshendi jospardyń jalpy investitsiianyń kólemi shamamen 2 trln teńgeni qurap otyr. Onyń basym bóligi – jeke investitsiialar. Oblysqa jeke investitsiia tartý jańa jobalardy iske asyrýǵa, sapaly jumys oryndaryn qurýǵa jáne óńir ekonomikasynyń jańa qurylymyn qalyptastyrýǵa múmkindik beredi», - dedi Premer-Ministr Úkimet otyrysynda.
A. Maminniń aitýynsha, aldyn ala baǵalaý boiynsha keshendi jospardyń iske asyrylýy óńdeý ónerkásibi men aýyl sharýashylyǵy ónimderiniń kólemin 1,5 ese ulǵaitýǵa múmkindik beredi. Jalpy óńirlik ónimniń ósý qarqynyn 5,2 paiyzǵa deiin qamtamasyz etedi. Jańa ósý núkteleri paida bolady. Oblystyń infraqurylymy jaqsarady.
«Jalpy óńir sapaly damý úshin jańa impýlske ie bolady. Eń bastysy, 26 myń jumys orny qurylady. Qarjylandyrý kóleminiń artýy men halyqtyń turmys sapasynyń jaqsarýy óńirdegi kóshi-qon úrdisterin turaqtandýǵa múmkindik berip, jastardyń turaqtaýy men mamandardyń kelýine qosymsha jaǵdai jasaityn bolady. Buǵan bilim berý men densaýlyq saqtaý salalaryn belsendi damytý septigin tigizedi», - dedi Prmer-Ministr.
Úkimet otyrysy barysynda Soltústik Qazaqstan oblysynyń 2021-2025 jyldarǵa arnalǵan áleýmettik-ekonomikalyq damýynyń keshendi jospary bekitildi.
«Ulttyq ekonomika ministrligine jáne Soltústik Qazaqstan oblysynyń ákimdigine múddeli memlekettik organdarmen birlesip, keshendi jospardyń is-sharalaryn ýaqtyly jáne sapaly oryndaýdy qamtamasyz etýdi tapsyramyn», - dedi Asqar Mamin.
Budan buryn habarlanǵandai, búgin Úkimet otyrysynda QR Ulttyq ekonomika ministri Áset Erǵaliev Soltústik Qazaqstan oblysynyń 2021-2025 jyldarǵa arnalǵan áleýmettik-ekonomikalyq damýynyń keshendi josparyn tanystyrdy. Ony iske asyrýdyń jalpy somasy 1,8 trln teńge. Osy oraida Soltústik Qazaqstan oblysynda 2,3 mln sharshy metr nemese 21,7 myń páter salynatyny belgili boldy. Qoima jáne saýda alańdarymen qamtamasyz etý úshin «Qyzyljar» saýda-logistikalyq haby qurylady.
