Soltústik Qazaqstan oblysynda birneshe eldiń azamattarynan quralǵan uiymdastqan qylmystyq top anyqtaldy. Olar Qazaqstanǵa 68 myń eýro bolatyn jalǵan banknota ákelgen, dep habarlaidy "Ult aqparat" Qarjy monitoringi komitetiniń baspasóz qyzmetine silteme jasap.
QR QM Qarjy monitoringi komitetiniń Soltústik Qazaqstan oblysy boiynsha Ekonomikalyq tergeý departamenti Qazaqstan Respýblikasy aýmaǵyna 500 eýro qunyndaǵy jalǵan qaǵaz aqsha jetkizetin kanaldyń jolyn kesti.
«Komitettiń SQO Ekonomikalyq tergeý departamenti qyzmetkerleri júrgizgen jedel-tergeý is-sharalarynyń nátijesinde jalǵan aqsha ótkizýmen ainalysqan bir top tulǵa áshkerelendi. Uiymdasqan qylmystyq top Qazaqstan, Resei Federatsiiasy jáne Grýziia azamattarynan quralǵan. Qańtar aiynda RF azamatyna elimizdiń aýmaǵynda ári qarai taratý úshin 100 000 eýro somasyndaǵy jalǵan aqsha qarajatynyń berilgeni anyqtaldy», delingen habarlamada.
Odan 2 000 000 teńge, 30 000 reseilik rýbl qolma-qol aqsha jáne jalpy somasy 68 000 eýro 136 jalǵan 500 eýro nominalyndaǵy aqsha tárkilendi.
«Búgingi tańda Petropavl qalasynyń Arnaiy tergeý sotynyń qaýlysymen QR QPK 147-babyna sáikes kúdikti tulǵalar qamaýǵa alyndy. Bul fakti boiynsha QR QK 231-babynyń 2- bóligi, 1-tarmaǵy (múlikti tárkileýmen 5 jyldan 10 jylǵa deiin bas bostandyǵynan aiyrý jazasy), 264-babynyń 1-bóligi (10 jyldan 15 jylǵa deiin bas bostandyǵynan aiyrý jazasy) sáikes sotqa deiingi tergeý isi tirkeldi», delingen habarlamada.
Aita keterligi, sońǵy eki jylda Qazaqstanǵa jalǵan banknota ótkizýdiń 18 faktisi anyqtalǵan jáne jalpy somasy 266 500 eýro (110 mln teńgeden astam soma) quraityn 500 eýro nominalyndaǵy 533 qaǵaz aqsha tárkilendi.
QR QM Qarjy monitoringi komiteti abai bolyp, valiýtany bankterde chek talap ete otyryp, aiyrbastaýdy usynady. Mamandar jalǵan aqsha jasaýshylarǵa aldanyp qalmas úshin 500 eýro nominalyndaǵy jalǵan qaǵaz aqshany tanyp bilýdiń eń qarapaiym erejesin este saqtaýdy usynady.
