Soltústik Qazaqstan oblysynyń úsh eldimekeninde úi qustarynyń neden qyrylǵanyn anyqtaý úshin Veterinariia boiynsha ulttyq referenttik ortalyǵynan mamandar keledi, dep habarlaidy "Ult aqparat".
SQO Shal aqyn aýdanyndaǵy Sýhorabovka, Ǵ.Músirepov aýdanyndaǵy Chernobaevka jáne Timiriazev eldimekeninde 9-11 qyrkúiek aralyǵynda shamamen 700 bas úi qusy qyryldy.
Veterinarlyq qyzmet ólgen taýyqtan patologiialyq material alyp, zerthanaǵa jiberdi. Ázirge, nátijesi belgisiz. Búgin óńirge Veterinariia boiynsha ulttyq referenttik ortalyǵynan mamandar kelmek. Olar synama alyp, Nur-Sultan qalasyna áketip zertteitin bolady.
«Biz qyrylǵan qustyń kózin joidyq. Aýlalardy zararsyzdandyrdyq. Ólgen qus boiynsha kúndelikti monitoring júrgiziledi. Biraq ázirge jańa derekter anyqtalǵan joq. Budan basqa halyqpen túsindirý jumystaryn júrgizip jatyrmyz», - deidi SQO veterinariia basqarmasynyń basshysy Berik Áljanov.
Resmi málimet boiynsha, Qazaqstan qus tumaýy órshigen Reseidiń Omby oblysynan qusty jáne shiki qus ónimderin engizýge shekteý qoidy. Alaida qus qyrylǵan eldimekender Reseimen shekaralas jatqan joq.
«Qazir qus qyrylǵan aýyldardy jabýǵa negiz joq. Saraptamanyń qorytyndysyn kútemiz. Diagnoz qoiylǵannan keiin naqty is-sharalar qolǵa alynady. Iaǵni bul eldimekenderdi karantinge jabý nemese kirip-shyǵýdy shekteý boiynsha. Saraptama qorytyndysy erteńderi daiyn bolýy tiis», - deidi Berik Áljanov.
Basqarma basshysynyń aitýynsha, qustyń neden qyrylǵanyn saraptama qorytyndysy kelmei, aitýǵa iýbolmaidy. Óitkeni klinikalyq belgileri birneshe aýrýǵa uqsaidy.
«Pasterellez, salmonellez jáne qus tumaýy, niýkasl aýrýy jáne kolibakterioz. Qaisy ekenin qazir aitýǵa bolmaidy, óitkeni belgileri uqsas. Bulardyń barlyǵy – infektsiialyq aýrýlar. Iaǵni qustardyń dene qyzýy kóteriledi. Ishi ótedi, álsizdik paida bolady, bastaryn artqa salady, aidary kógeredi», - deidi Berik Áljanov.
Osydan eki jyl buryn SQO-nyń Aiyrtaý aýdanynda qustarda niýkasl aýrýy tirkelgen bolatyn.
