Petropavlda naýqaspen jaqyn qarym-qatynasta bolǵan eki adamnan qaýipti indet anyqtaldy, dep habarlaidy "Ult aqparat".
Shuǵyl shtabtyń málimetinshe, COVID-19 indetin juqtyrǵan ekeý Petropavl qalasynda turady. Er adam - 1955, áiel – 1988 jyly týǵan. Olar astanada emdelip, sol jaqta koronavirýs juqtyryp alǵan 63 jastaǵy áielmen jaqyn qarym-qatynasta bolǵan.
COVID-19-ǵa tekserý nátijesinde olardyń saraptamasy oń nátije berdi. Qaýipti virýsty juqtyrǵandar Petropavldaǵy birinshi qalalyq aýrýhananyń juqpaly aýrýlar bólimine jatqyzyldy. Naýqastarda aýrýdyń klinikalyq belgileri joq. Olarmen bailanysta bolǵan 7 adam anyqtaldy. Epidemiologiialyq tergeý jumystary júrgizilip jatyr.
Jalpy, 2 maýsymdaǵy jaǵdai boiynsha SQO aýmaǵynda COVID-19 virýsyn juqtyrǵan 61 adam tirkelgen.
