Soltústik Qazaqstan oblysynda tórt qus fabrikasynyń ózara sóz bailasý arqyly bir ýaqytta jumyrtqa baǵasyn kóterip otyrǵandyǵy anyqtaldy, dep habarlaidy "Ult aqparat".
QR Básekelestikti qorǵaý jáne damytý agenttiginiń SQO boiynsha departament basshysynyń mindetin atqarýshy Natalia Shaiahmetovanyń aitýynsha, baǵa monitoringi jáne SQO tutynýshylardyń quqyqtaryn qorǵaý departamentiniń haty aiasynda jumyrtqa baǵasy tekserilip, naryqqa taldaý júrgizildi. Nátijesinde oblystaǵy jumyrtqa óndiretin 4 qus fabrikasynyń kelisilgen básekelestikke qarsy áreketteri anyqtaldy.
«Ótken jyldyń qarasha aiy men biylǵy qańtar aiyndaǵy aralyqty aldyq. Alaida, jumyrtqa baǵasy naýryz aiynda da qymbattady. Olar kelisim boiynsha bir ýaqytta jumyrtqanyń baǵasyn ósirip jibergen. Osyǵan bailanysty departament bul kásiporyndarǵa eskertý hat jiberdi. Onyń nátijesi boiynsha qus fabrikalary bizge jumyrtqanyń kóterme baǵasyn túsirgendikteri jaiynda jaýap berdi. Iaǵni 1 sanattaǵy jumyrtqanyń baǵasyn 5-10 teńge aralyǵynda túsirgen. Olar «Iakor», «Esil», «Adel qus» jáne «Alekri» qus fabrikalary», - deidi Natalia Shaiahmetova.
Birinshi sanattaǵy áleýmettik jumyrtqanyń qazir kóterme baǵasy - 370 teńge.
«Sýbektiler bizdiń eskertýimizge qulaq asyp, baǵany tómendetetin bolsa, isti ári qarai tergeý týraly buiryq shyǵarylmaidy. Eger de olar eskertilgennen keiin 30 kún ishinde shara qoldanbasa, onda monopoliiaǵa qarsy organ tergeý júrgizýge buiryq shyǵarady. Tergeýdiń nátijesi boiynsha ákimshilik jaýapqa tartylady», - deidi departament basshysynyń mindetin atqarýshy Natalia Shaiahmetova.
