Soltústik Qazaqstan oblysynda kóktemgi sý tasqyny bastaldy. Erigen qar sýy óńirdegi eki avtojoldy shaiyp ketti, dep habarlaidy "Ult aqparat".
SQO tótenshe jaǵdailar departamenti óńirdegi sý tasqyny boiynsha brifing ótkizdi. Vedomstvo basshysynyń orynbasary Murat Qanǵojinovtyń aitýynsha, qutqarýshylar 25 naýryzdan beri oblys ákiminiń tapsyrmasymen joǵary daiyndyq rejiminde jumys istep jatyr. Sý tasqynynyń aldyn alý maqsatynda birqatar is-sharalar júrgizildi.
«Sáýir aiynyń besinen bastap aýa raiy jylynyp, qar tez eri bastady. Keshe Esil aýdany Gornoe elimekeniniń mańynda sý oblystyq mańyzy bar avtojoldy shaiyp ketti. Jol ústinen ótken sýdyń tereńdigi 5 sm, uzyndyǵy 30 metr boldy. Búgin tańerteń sýdyń joldan asyp tógilý aýmaǵy 10 metrge azaidy.
Búgin Shal aqyn aýdanynda Voloshinka-Sergeevka-Timiriazevo baǵytyndaǵy respýblikalyq mańyzy bar KT27 avtojolynyń 40 km-de, Qaratal aýylyna 4 km jetpei, alqaptardaǵy qardyń erýinen sý joldy shaiyp ketti. Jol ústinen ótken sýdyń tereńdigi 15 sm, 45 metr jerdi alyp jatyr. Bul eki jolmen de kólikter esh kedergisiz júrip jatyr. Jol qyzmetteri tiisti jol belgilerin qoidy», - deidi SQO TJD bastyǵynyń orynbasary Murat Qanǵojinov.
Departamentte jedel shtab jumys istep jatyr. Keshe turǵyndar kómek surap, 19 ótinish túsirgen. Erigen qar sýy úilerge kirmeýi úshin motopompalarmen soryldy, ekskavatormen jyralar qazyldy. Oblys boiynsha, búginge deiin turǵyn úilerge sý kirý deregi tirkelgen joq.
«Ǵ.Músirepov atyndaǵy jáne Aiyrtaý aýdandarynda shaǵyn ózenderde sý molaiyp jatyr. Olar keiin Esilge quiylyp, Sergeev sý qoimasyna keledi.
Sergeev sý qoimasynda jaǵdai ázirge turaqty, asyp tógilýi úshin áli 1 metr kerek. Byltyr bul ýaqytta erneýinen asqan edi.
«Qazgidromet» ózen-kólderdegi sý deńgeii, aýa temperatýrasy, topyraqtyń qatýy boiynsha kúndelikti habardar etip otyr. Kóktemgi sý tasqynynyń zardabyn azaitý maqsatynda jergilikti atqarýshy bilikpen birge jumystar atqarylyp jatyr. Birer kún buryn eki top Ǵ.Músirepov atyndaǵy jáne Aiyrtaý aýdandaryna jiberildi», - deidi Murat Qanǵojinov.
