Soltústik Qazaqstan oblysynda sý tasqyny kezinde qaýip tónetin 92 eldi meken esepke alyndy, dep habarlaidy QazAqparat tilshisi.
36 aýylda ózen sýynyń deńgeii joǵary bolsa, 41-inde - qardyń erýi saldarynan jáne 15 eldi mekende - sý deńgeiiniń kóterilýi men kóldiń tolýy saldarynan sý tasqyny bolýy múmkin.
«Jergilikti atqarýshy organdar 84 eldi mekende 3 jyldyń ishinde 79,5 shaqyrym bóget quryp, 28 shaqyrym sý aidaityn kanaldar qazdy. 18 eldi mekende injenerlik-tehnikalyq is-sharalar júrgizý múmkin bolmady. Sebebi, olar ózen ańǵarlarynda, orman alabynda ornalasqan», - dedi oblys ákiminiń orynbasary Anton Fediaev.
Qazir óńir sý tasqynyna daiyndalyp jatyr. Byltyr qazanda tótenshe jaǵdailar departamentiniń qyzmetkerleri Esil, Aiyrtaý, Ǵabit Músirepov jáne Shal aqyn aýdandarynyń aýmaǵynda sý tasqyny bolatyn eldi mekenderde tekserý júrgizdi.
Atap aitqanda, Esil aýdanyndaǵy eldi mekenderge Úlken Torańǵul kóli qaýip tóndirip otyr. Kishi Torańǵuldyń sýy Úlken Torańǵulǵa quiylyp, sonyń saldarynan kóldegi sý deńgeii 5 sm kóterilgen.
«Kishi Torańǵuldaǵy sý deńgeiin tómendetý úshin Qamysaqty ózenine deiin sý ótkizetin kanal qalpyna keltirildi. Novopokrovka aýylyna jaqyn jerde sýarmaly-sýlandyrý kanaly júiesinde diametri 1 metr bolatyn qubyr ornatylyp, ol arqyly ótken jyldyń shildesinen bastap 5 mln tekshe metr sý jiberildi. Ózen deńgeii 30 sm azaidy», - dedi A. Fediaev.
Kóktemgi sý tasqyny kezeńinde tótenshe jaǵdaidy joiý úshin 708 tehnika, 331 sý aidaityn qurylǵy daiyn. Qutqarýshylar men politseilerden quralǵan top jasaqtalǵan. Sondai-aq, 724 mln teńge somasynda oblystyq rezerv quryldy.
