Soltústik Qazaqstan oblysynda Reseiden kelgen áiel ózin balgermin dep tanystyryp, 81 jastaǵy ájeidiń jiǵan-tergen qarjysyn aldap alǵan, dep habarlaidy "Ult aqparat".
SQO Politsiia departamenti baspasóz qyzmetiniń málimetinshe, Aiyrtaý aýdanynyń politseileri Mamliýt aýdanyndaǵy áriptesterimen birge 81 jastaǵy zeinetkerge qatysty alaiaqtyq deregin ashty.
Belgisiz áiel eldi mekenderdiń birinde aýyl turǵynynyń esigin qaǵyp, bal ashyp berýdi usynǵan. Zeinetkerdi aldap-sýlap, onyń jiǵan-tergen 400 myń teńgesin qaltasyna basyp, izin sýytypty.
«Tergeýshiler jumys barysynda kúdiktiniń júrgen jolyn anyqtady. Ol aýdan aýmaǵynan ketip úlgergen. Oblys boiynsha alaiaqtyń belgileri taratylyp, politseilerge eskertildi. Nátijesinde kúdiktige uqsas áiel Mamliýt aýdanynda ustaldy. 1983 jyly týǵan reseilik óz kinásin moiyndap, zeinetkerden keshirim surady. Aqshasyn tolyq qaitaryp berdi», - deidi Aiyrtaý aýdandyq politsiia bólimi bastyǵynyń orynbasary Grigorii Lýkianenko.
Tergeý barysynda sheteldiktiń óz qyzmetin usynyp, jurttyń mazasyn alǵany anyqtaldy. Kóshi-qon qyzmeti onyń bul áreketin QR ákimshilik quqyq buzýshylyqtyń 449 baby «Qoǵamdyq oryndarda tiisý» dep baǵalady. Osy baptyń úshinshi bóligi boiynsha sheteldik, ne azamattyǵy joq adamǵa 5 AEK mólsherinde aiyppuldan bastap 5 jylǵa deiin Qazaqstan Respýblikasynyń aýmaǵynan shettetý jazasy kesiledi. Búgin sottyń úkimimen reseilik áiel el aýmaǵynan shyǵaryldy.
Jalpy jyl bastalǵaly SQO-da alaiaqtyqqa qatysty 178 qylmys tirkelse, sonyń 110-y ashyldy.
