Soltústik Qazaqstan oblysynda memlekettik arhiv áli kúnge deiin aqtalmaǵan saiasi qýǵyn-súrgin qurbandarynyń elektrondy málimetter bazasyn jasaqtap jatyr, dep habarlaidy "Ult aqparat".
SQO memlekettik arhiv direktory Sáýle Málikovanyń aitýynsha, óńirde osy kúnge deiin 7721 adamdy prokýratýra organdary aqtap, olar arhivtiń málimetter bazasyna engizilgen.
Alaida óńirde solaqai saiasattyń kesirinen jazyqsyzdan «halyq jaýy» atanyp, áli kúnge deiin aqtalmaǵandar jeterlik.
Byltyr oblystyq arhiv qyzmetkerleri osyndai 5 adamnyń qujattaryn taýyp, biraz jumys tyndyrǵan.
«SQO memlekettik arhivi qazirgi tańda áli kúnge aqtalmaǵan saiasi qýǵyn-súrgin qurbandarynyń elektrondy málimetter bazasyn jasaqtap jatyr. Sol kezde jazyqsyz sottalǵandardyń qujattaryn elimiz táýelsizdik alǵannan keiin oblystyq arhiv jariia etti. Bul partiialyq qujattar, oblystyq basqarýshy organdardyń, oblystyq prokýratýranyń qujattary, túrli aqparlar, qazir osy málimettermen biz úlken jumys atqaryp jatyrmyz. 93-97 jyldary jumys istegen komissiia 58 bap boiynsha sottalǵandardyń aty-jónin anyqtaýda bul qujattardy tolyq qaramaǵan. Biz arhivtegi osy qujattardy negizge ala otyryp, osy 58-59 bap boiynsha otyrǵan adamdardyń qylmystyq isterin qarap jatyrmyz», - deidi Sáýle Málikova.
Óńirlik arhiv direktorynyń aitýynsha, respýblikalyq komissiia aqtalmaǵandardy anyqtaýdyń metodologiiasyn jasady. Bul qyzmetkerlerdiń jumysyn birshama jeńildetken.
Máselen, Ýálihanov aýdanynda 1930 jyldardaǵy qylmystyq isterge qatysty qujattar tabyldy.
Olar osy bekitilgen ádis boiynsha aqtalmaǵandardyń tizimin jasap jatyr.
«Arhivten 1921 jyly bolǵan «Esil kóterilisine» qatysty kóptegen qujat tabyldy. Bul oqiǵa óz baǵasyn áli kúnge ala almai otyr. Kóteriliske qatysty 1921 jylǵy qujattar bizdiń arhivte saqtalǵan. Oǵan qatysýshylardy aiaýsyz jazalaǵan. Bizde 200-den astam adamnyń tizimi bar, olar atylyp ketke», - deidi SQO memlekettik arhiv direktory Sáýle Málikova.
