Soltústik Qazaqstan oblysynda biyl birqatar tarihi-mádeni mańyzy bar nysan kúrdeli jóndelmek. Sonyń biri – Petropavldaǵy 1870 jyly tastan qalanǵan meshit, dep habarlaidy "Ult aqparat".
SQO mádeniet, tilderdi damytý jáne arhiv isi basqarmasy jetekshisiniń mindetin atqarýshy Dosbol Ábdiriisov óńirlik kommýnikatsiialar qyzmetiniń brifinginde salaǵa qatysty josparlarmen bólisti.
Mamannyń aitýynsha, biyl mádeniet salasyna 6,6 mlrd teńge bólingen. 2601 adam eńbek etse, olardyń ortasha eńbekaqylary 105 myń teńge shamasynda.
Biyl óńirde memlekettik baǵdarlamalar aiasynda Aqsýat aýylynda mádeni-saýyqtyrý ortalyǵynyń qurylysy bastalmaq. Birneshe eldi mekende aýyl klýbtary, aýdandyq mádeniet úileri jónge keltirilip, 10 aýdandaǵy mádeni-saýyqtyrý ortalyqtaryna kerek-jaraq alynbaq.
«2020-2024 jyldarǵa arnalǵan tujyrymdamaǵa sáikes, respýblikalyq biýdjetten birqatar nysandarda ǵylymi-qalpyna keltirý jumystaryna qarajat bólindi. Solardyń ishinde «Syrymbat» qonysy bar. Biyl 25 mln teńge jumsalmaq. «Botai» qonysyna biyl 10 mln, keler jylǵa 15 mln teńge bólindi. Qarasai-Aǵyntai batyrlardyń memorialdyq keshenine 2023 jyly 22,5 mln, Abylaihan rezidentsiiasyna 2022 jyly 21,9 mln teńge jumsalady», - deidi Dosbol Ábdiriisov.
Budan basqa SQO-ny 2021-2025 jyldary áleýmettik-ekonomikalyq damytý keshendi jospary aiasynda «Qyzyl Oba», «Aq-Irii», «Baiqara» arheologiialyq eskertkishterinde aýyqmdy jumystar júrgiziledi. Osy maqsatqa 202 mln teńge kezeń-kezeńmen bólinbek.
Petropavlda biyl «QYZYLJAR art center» atty óz arbaty paida bolmaq. Art-ortalyq úsh aimaqtan: saýda pavilonynan, aqparattyq-kórme ortalyǵynan jáne qolóner sheberleriniń sheberhanalarynan quralmaq.
Aqan Seri atyndaǵy oblystyq filarmoniia ǵimaraty da jóndeledi. Ólketaný mýzeiiniń ekspozitsiia zaldary jańarady. Oblys ortalyǵynda jergilikti sýretshilerge óz kórmelerin uiymdastyrýǵa múmkindik beretin «BOTAI» zamanaýi kórkem galereia paida bolmaq.
«Petropavlda HH ǵasyrdyń basynda alty tastan qalanǵan jáne úsh aǵashtan istelgen meshit bolǵan. Solardyń biri – kópes Dáýletkeldievtiń 1870 jyly salynǵan meshiti. Tastan qalanǵan meshit qazir Kirov atyndaǵy zaýyttyń aýmaǵynda ornalasqan. Onyń buryn meshit bolǵanyn qasynda saqtalǵan munarasynan baiqaýǵa bolady. Bul – 19 ǵasyrǵa jatatyn Islam mádenietiniń eskertkishi», - deidi SQO mádeniet, tilderdi damytý jáne arhiv isi basqarmasy jetekshisiniń mindetin atqarýshy Dosbol Ábdiriisov.
