Soltústik Qazaqstan oblysy Beskól aýylynda turǵyn úidiń sharýashylyq nysandary órtenip, órt sóndirýshiler kelgenshe eki gaz ballony jaryldy, dep habarlaidy QazAqparat.
SQO Tótenshe jaǵdailar departamentiniń málimetinshe, búgin saǵat 9.26 minýt ketkende 101 pýltine Beskól aýylyndaǵy Lesnaia-Lýgovaia kóshesinde órt shyqqandyǵy jóninde habar tústi. Oqiǵa ornyna №12 órt sóndirý bólimshesiniń eki tehnikasy jiberildi. Mamandar kelgen ýaqytta úidiń qasyndaǵy ýaqytsha nysan, garajy men monshasy otqa oranyp úlgerip, mundaǵy eki gaz ballony jarylǵan. Olardyń barlyǵy bir shatyr astynda bolǵan. Osylaisha 240 sharshy metr janyp ketti. Órttiń shyǵý sebepteri anyqtalyp jatyr.
Taǵy bir órt keshe Petropavlda boldy. Úiler tyǵyz ornalasqandyqtan oqiǵa ornyna birden úsh órt sóndirý bólimderiniń mamandary jumyldyryldy.
«Saǵat 12.08 minýt ketkende 101 pýltine M.Áýezov kóshesi, 82 úide órt shyqqandyǵy jóninde habar tústi. Jalyn jaiylmaýy úshin órtke ekinshi deńgei berildi. Órt sóndirýshiler 5 minýttyń ishinde jetti, olar kelgen kezde eki qabatty úidiń shatyry jáne úidiń kire berisi otqa oranyp úlgergen eken. Jalyn 96 sharshy metr aýmaqqa jaiyldy. Aldyn ala boljam boiynsha, órt peshti durys qoldanbaýdan shyqqan. Zardap shekkender joq, órt saǵat 13.22 minýt ketkende tolyq sóndirildi», - deidi SQO tótenshe jaǵdailar departamenti bastyǵynyń orynbasary Oral Ábdirahmanov.
Jalpy, jyl basynan oblysta 600-ge jýyq órt tirkelip, otta 41 adam qaza tapty, 37 adam túrli dene jaraqatyn aldy. Taǵy 6 adam ýly gazdan ýlanyp kóz jumsa, 15 adam jaraqattandy. Órtten kelgen materialdyq zalal – 229 mln teńge shamasynda.
