SQO ákimi bala týǵany úshin tólenetin tólemdi eki ese arttyrýdy usyndy, dep habarlaidy "Ult aqparat" Stan.kz aqparat agenttigine silteme jasap.
Soltústik Qazaqstan oblysynyń ákimi Ǵaýez Nurmuhambetov Senat otyrysynda óńirdegi demografiialyq jaǵdaidyń nasharlaýy men bala týý deńgeiiniń tómendeýi, jalaqynyń tómendigi, aýyl turǵyndarynyń azaiý máselelerin kóterdi.
Osyǵan bailanysty ol óńirde halyqty ustap turýǵa múmkindik beretin qoldanystaǵy tólemderdi ulǵaitý jáne jańalaryn engizý boiynsha birneshe usynystaryn aitty. Sonyń biri oblys aýmaǵynda turatyn 4 jáne odan da kóp balasy bar kóp balaly analarǵa beriletin ai saiynǵy memlekettik járdemaqyny, týǵanyna jáne bala kútimine bailanysty birjolǵy járdemaqyny eki ese arttyrý boiynsha pilottyq jobany qoldanýdy usyndy.
Sondai-aq Ǵaýez Nurmuhambetov óńirdegi jumyssyz azamattardy jumysqa alǵan jumys berýshilerge árbir qyzmetker úshin 2 jyl boiy 30 AEK (110 760 teńge) kóleminde sýbsidiia tóleýdi usyndy.
"Bul eńbek naryǵyn kóleńkeden shyǵarýǵa jáne jeke sektordaǵy jalaqyny óńirdegi ortasha ailyq kórsetkishke deiin arttyrýǵa múmkindik beredi", – dedi ákim oblys ákimi.
Ǵaýez Nurmuhambetov halyqtyń áleýmettik jaǵynan osal toptaryna, "Diplommen aýylǵa" baǵdarlamasy boiynsha kelgen jas mamandarǵa, sondai-aq kóship kelýshi qandastarǵa otyn men kómir satyp alý úshin jylyna bir ret 35 AEK (129 220 teńge) kóleminde áleýmettik kómek kórsetýdi qarastyrýdy surady. Sebebi oblysta jylytý maýsymy 222 kúnge sozylady.
