SQO ákimi Qumar Aqsaqalov Kann kinofestivalinde top jarǵan jerles aktrisa Samal Eslámovamen kezdesti.
Kezdesýge Samaldyń ata-anasy Iliias jáne Gúlmaira Eslámovter, Samaldyń alǵashqy synyp jetekshisi Zýhra Abýqyzy jáne Samal jumys istegen Sábit Muqanov atyndaǵy sazdy-drama teatrynyń akterleri, sondai-aq óner kolledjiniń oqytýshylary men stýdentteri qatysty.
Óńir basshysy osy kúnge deiin Qazaqstannyń jáne tipti TMD elderiniń aktrisalary osy ataqqa qol jetkize almaǵandyǵyn basa aitty. Qumar Aqsaqalov áigili akterler men aktrisalardyń rýhani álemi týǵan jerimen myqty bailanysta deidi.
«Álemdegi eń tanymal kinofestivalge qatysyp, top jaryp, jetistikke jetý Qazaqstanda ǵana emes, TMD elderinde bolmaǵan jaǵdai. Qazaqtyń atyn, rýhyn kótergeniń úshin Samalǵa alǵysymyz sheksiz. Qarapaiym aýyldan shyǵyp, osyndai jetistikke Samal óziniń daryndylyǵynyń arqasynda qol jetkizdi. Kóp adamdar áigili akterler úlken qalalarda týady dep oilaidy. Shyn máninde, naǵyz akterler men aktrisalar shaǵyn aýyldardan shyǵady. Adamnyń ishki rýhani álemi ata-jurtynan, týǵan jerinen, tarihynan nár alady. Samaldyń jetistigi osyǵan dálel», — dedi Qumar Aqsaqalov.
Samal Eslámova dúiim jurtqa quttyqtaýlar men qoldaýlary úshin alǵysyn jetkizdi.
«Elge kelip, jerlesterimdi kórý men úshin qýanysh. Meni qoldap, quttyqtap jatqandaryńyz úshin kóp alǵys aitamyn», — dedi Samal Eslámova.
Kezdesýde Samaldyń ata-anasy sóz sóilep, qyzdarynyń úlken jetistigine jyly tilekterin bildirip jatqan soltústikqazaqstandyq jamaǵatqa alǵystaryn jetkizdi.
Kezdesý sońyna marapattaý rásimi ótti. Qumar Aqsaqalov Samal Eslámovaǵa 3-bólmeli páterdiń kiltin tabys etti. Aktrisa oblys ákiminiń qurmet gramotasyna da ie boldy. Iliias jáne Gúlmaira Eslámovter oblys ákiminiń alǵys hatymen marapattaldy.
