Qazaqstanda mamyrda kóktemgi atmosferalyq protsester jazǵy túrine aýysady. Alaida uzaq jylýdan keiin, sýyq aýa raiy oralýy múmkin, al túngi ýaqytta tipti úsikter júrý yqtimaldyǵy joǵary, - dep habarlaidy Tengrinews.kz tilshisi "Qazgidromet" RMK ortalyǵyna silteme jasap.
Sáýirden mamyrǵa qarai Qazaqstan Respýblikasynyń soltústik jartysynda, sonymen qatar, ońtústik jáne ońtústik-shyǵysynyń taýly jáne taý bókterindegi aýdandarynda jaýyn-shashyn mólsheri kóbeiedi.
"Mamyrdyń birinshi kúni respýblikanyń basym bóliginde +20+28 gradýs, ońtústiginde +33 gradýsqa deiin jazǵy ystyq aýa raiy saqtalady. QR soltústik-batys bóliginde tsiklondardyń ótýimen jańbyr, kei ýaqytta kúshti, ekpindi jel, daýyl, burshaq jáne aýa temperatýrasynyń tómendeýi kútiledi. Keiinen osyndai aýa raiy Qazaqstannyń basqa aýdandarynda da bolady", - delingen habarlamada.
Aidyń birinshi jartysynda tsiklondar men antitsiklondar aýysyp, aýa-raiy turaqsyz sipatta bolady jáne aýa temperatýrasynyń aýytqýy boljanady:
- respýblikanyń batysynda túnde +3+13 gradýs, óńirdiń soltústiginde 3 gradýs úsikten +8+15 gradýs, kúndiz +10+20 gradýstan +18+25 gradýsqa deiin;
- elimizdiń soltústiginde, ortalyǵynda jáne shyǵysynda túnde +5+15 gradýstan 0,+7 gradýsqa deiin, kei ýaqytta 1-6 gradýs úsik, kúndiz +18+25 gradýstan +8+18 gradýsqa deiin;
- ońtústiginde, ońtústik-shyǵysynda túnde +10+20 gradýstan +5+15 gradýsqa deiin, kúndiz +23+33 gradýstan +15+22 gradýsqa deiin.
Aidyń ekinshi jartysynda Iran aýdandarynan jyly aýa massalarynyń qarqyndy shyǵarylýy nátijesinde, respýblikanyń soltústik jartysynda aýa temperatýrasynyń birtindep +25+35 gradýsqa deiin, al ońtústik jartysynda +30+35 gradýs, qiyr ońtústik pen ońtústik-batysta +40 gradýsqa deiin joǵarylaýy boljanady.
Mamyrdyń ekinshi jartysynyń jekelegen kúnderi atmosferalyq fronttardyń ótýine bailanysty naizaǵai men jańbyr boljanady, aptap ystyqtyń kúndiz +20+25 gradýsqa deiin azdap tómendeýi kútiledi. Ońtústik óńirlerde de qysqa merzimdi jańbyr, naizaǵai bolady, degenmen temperatýralyq fon basym túrde joǵary bolýy boljanyp otyr.
