Qazaqstannyń jetekshi infektsionist dárigeri, meditsina ǵylymdarynyń doktory Dinagúl Baesheva COVID-2019-ǵa shaldyqqan naýqastardy zertteý nátijesin baiandady, dep habarlaidy QazAqparat.
«13 naýryzdan beri aýrýhanaǵa túsken naýqastardyń 39 paiyzynda simptom bolmaǵan. Al 36,7 paiyzynda COVID-2019 jeńil formada ótken. Osy eki kórsetkishti qossaq, 70 paiyzdan asyp ketedi. Iaǵni, esh belgisi joq, jeńil túrdegi aýrýlar 70-75% aralyǵynda bolyp otyr. Sonyń ishinde ortasha dárejede – 20%, aýyr dárejede -2%», - dep atap ótti D. Baesheva Feisbýk jelisinde ótken onlain suhbatta.
Onyń aitýynsha, simptomsyz naýqastar ishinde de ýaqyt óte kele aýrý belgileri paida bolady.
«Bizdiń esebimiz boiynsha, ýaqyt óte kele simptomsyz kelgen naýqastardyń 15% - koronavirýstyń jeńil túrine aýysady, keibiri ortasha túrine, al 3 adam nemese 0,5% - aýyr dárejege aýysqan. Simptomsyz naýqasty 14 kún baqylaǵannyń ózinde de esh kórinis bolmaýy kerek. Sol adamdy biz «Simptomsyz naýqas» dep ataimyz. Kóbinese 20-59 jas aralyǵyndaǵy turǵyndardyń aýrýy simptomsyz jáne jeńil túrde ótedi», - dedi maman.
Ádette simptomsyz naýqastardyń boiynan 2,3,4-kúnderi aýrý belgileri paida bolady. Sondyqtan, sipmtomsyz naýqastar úige jiberilse de, olardyń densaýlyǵyna monitoring júrgiziledi.
«Máselen, ekinshi kúnnen bastap, naýqastardyń 10 paiyzynda dene qyzýy paida bolǵan. Sonymen birge, jótel, tamaq aýrýy, murynnyń bitelýi nemese iis sezbeýi baiqalǵan. Jeńil túrde ótetin bolsa, ol adamdardy da úide emdeimiz. Ol kisilerge esh em kerek emes. Óitkeni esh klinikalyq kórinis joq. Biraq, ol kisiler epidemiologiialyq turǵyda qaýipti. Simptomdary bar adamdar dene qyzýy, jótel, bas aýrýy sekildi klinikalyq kórinisteri bolady. Ásirese jótelgen, túshkirgen adamdar asa qaýipti. Olar óz silekeiimen birge virýsty aýaǵa, qasyndaǵy adamǵa shashyratýy múmkin. Virýstyń syrtynda maily qabyrshaǵy bolady, sondyqtan bul virýs adamǵa jabysqaq bolyp keledi. Qoldy sabynmen jýý jáne spirtpen súrtińiz dep jii aitamyz. Sebebi, spirt pen sabyn maidy eritip jiberedi», - dedi Dinagúl Baesheva.
