QR Syrtqy ister ministrliginiń burynǵy jaýapty hatshysy Anarbek Qarashev pen Qazaqstannyń Ózbekstandaǵy elshisi Erik Ótembaevqa qatysty Nur-Sultan qalasy «Baiqońyr» aýdany №2 sotynyń aiyptaý úkimi shyqty, dep habarlaidy QazAqparat.
«Sot olardy Ózbekstandaǵy Qazaqstan Elshiliginiń ákimshilik ǵimaratyn salý kezinde oryndalǵan jumystardy qabyldaý boiynsha laýazymdyq ókilettikterin teris paidalanǵany úshin kináli dep tanyp, 2 jylǵa bas bostandyǵyn shekteý jazasyn taǵaiyndady. Sonymen qatar, QR Prezidentiniń atyna atalǵan tulǵalardy «QR Tótenshe jáne ókiletti elshisi» diplomatiialyq dárejelerinen jáne «Eren eńbegi úshin» memlekettik nagradalary men «Qurmet» ordeninen aiyrý týraly usynys engizildi», - dedi Sybailas jemqorlyqqa qarsy is-qimyl agenttiginiń 1-shi departamentiniń asa mańyzdy ister jónindegi tergeýshisi Daniiar Bekaidarov onlain brifing barysynda.
Onyń aitýynsha osy úkimmen para bergeni jáne alǵany, sondai-aq Qarashevke kómekteskeni úshin taǵy 4 adam sottalǵan. Atap aitqanda «Diplomatiialyq qalashyq qurylysy direktsiiasy» JShS direktory B. Nurekenov 5 jylǵa bas bostandyǵynan, SIM Sharýashylyq basqarmasynyń direktory jáne bólim basshysy S. Sákenova men G. Jumasanova 2 jylǵa bas bostandyǵynan aiyrylǵan. Sondai-aq azamat R. Kýtdýsovqa 36,9 mln teńge aiyppul salynǵan.
«Olar Siriiaaralyq kelissózder, ShYU jáne EýrAzEQ otyrystary, Islam yntymaqtastyǵy uiymynyń sammiti siiaqty mańyzdy halyqaralyq is-sharalardy uiymdastyrý boiynsha qyzmetterge sharttar jasaý úshin para alǵan. Paranyń jalpy somasy 52 mln teńgeni qurady. Onyń ishinde 7,4 mln teńge Qarashevtiń 18 túrli meiramhanalar men saýnalarǵa barǵan shyǵyndary úshin tólengen. Sottalǵan tulǵalar memlekettik qyzmette qyzmet atqarý quqyǵynan ómir boiyna aiyryldy. Úkim zańdy kúshine engen joq», - deidi ol.
