Qazaqstan Prezidenti Qasym-Jomart Toqaevtyń tapsyrmasyna sáikes búgin Aýǵanstannan 35 qandastyń tarihi otanyna oralýy uiymdastyryldy, dep habarlaidy "Ult aqparat" Syrtqy istep ministrligi baspasóz qyzmetine silteme jasap.
«QR Qorǵanys ministrliginiń arnaiy ushaǵy Kabýldan Almaty qalasynyń áýejaiyna 41 jolaýshymen ushyp keldi, olardyń ishinde Qazaqstannyń 4 azamaty, Qyrǵyzstannyń 1 azamaty jáne Qazaqstanda turaqty turatyn 1 aýǵan bar. Kelgen jolaýshylar karantinnen ótý úshin ýaqytsha oqshaýlanady. Evakýatsiialyq reisti uiymdastyrý «Taliban» qozǵalysymen (Qazaqstanda tyiym salynǵan - avt.) úilestirilip júzege asyryldy. Qazaqstannyń Kabýldaǵy Elshiligi qalypty rejimde jumys isteidi jáne Aýǵanstanda turatyn qandastarmen turaqty bailanysta», delingen habarlamada.
Ministrliktiń málimetinshe, qazir ótinish berýshilerdiń etnikalyq sáikestigin rastaý jáne qandastardy qaitarý jumysy jalǵasyp jatyr.
Eske sala ketsek, QR Prezidenti Qasym-Jomart Toqaev jańadan taǵaiyndalǵan tótenshe jáne ókiletti elshileriniń Qazaqstan Prezidentine senim gramotasyn tapsyrý rásiminde Aýǵanstandaǵy qazaq diasporasyn elge qaitarý máselesin qarastyryp jatqanyn málimdegen edi.
18 tamyzda Qazaqstan Aýǵanstannan óziniń 25 azamatyn jáne Qyrǵyzstan, Resei men Litvanyń 16 azamatyn evakýatsiialady. Budan basqa, Almatyǵa Kabýldan Aýǵanstanǵa kómek kórsetý jónindegi BUU Missiiasy (UNAMA) jáne basqa da halyqaralyq uiymdardyń keńseleri ýaqytsha kóshirildi.
