Táýelsiz Qazaqstan diplomatiialyq qyzmetiniń 30 jyldyǵyn merekeleý aiasynda QR Syrtqy ister ministrligi ǵimaraty aldyndaǵy alańda bolashaq diplomattarǵa úndeý jazylǵan ýaqyt kapsýlasyn salý rásimi ótti, dep habarlaidy QazAqparat.
Bul kapsýlany olardyń áriptesteri týra 30 jyldan keiin, ulttyq diplomatiianyń 60 jyldyǵy atalyp ótiletin 2052 jyldyń 1 shildesinde ashýy kerek.
Is-shara barysynda QR Premer-Ministriniń orynbasary – Syrtqy ister ministri Muhtar Tileýberdi bolashaq diplomattar ózderiniń izasharlarynyń jumysyn laiyqty jalǵastyryp, elimizdiń ulttyq múddelerin qorǵaý men ilgeriletý jolynda da aianbai ter tógetinine senim bildirdi.
Saltanatty sharaǵa qatysýshylar aldynda sóz sóilegen qazaq diplomatiiasynyń qurmetti ardageri, kórnekti memleket qairatkeri Qýanysh Sultanov 30 jyldan keiin qazaq diplomatiiasy budan da zor tabystarǵa jetip, elimizdiń halyqaralyq arenadaǵy bedelin nyǵaitýǵa eleýli úles qosatynyna senim bildirdi.
Kapsýladaǵy bolashaq diplomattarǵa arnalǵan úndeýde Qazaqstannyń 30 jyldaǵy álemdegi ustanymy, qazirgi diplomattar men Qazaqstannyń diplomatiialyq qyzmeti ardagerleriniń qoshtasý sózderi men tilekteri jazylǵan.
Arnaiy ornatylǵan tuǵyrǵa kapsýlany salý qurmetti missiiasy jas diplomattar – Eýropa departamentiniń attashesi Altynai Dáribaeva men Adami resýrstar departamentiniń attashesi Damir Ahmetovke júkteldi.
Saltanatty is-sharaǵa SIM basshylyǵy, Qazaqstan Respýblikasy diplomatiialyq qyzmetiniń ardagerleri, qazirgi diplomattar jáne ministrlikte uiymdastyrylǵan «Halyqaralyq qatynastardyń qazirgi zamanǵy júiesindegi Qazaqstan Respýblikasy» atty halyqaralyq konferentsiiasynyń basqa da qatysýshylary qatysty.
