QHR basshysy Si Tszinpin Qytaidyń kedeilikti "tolyq eńsergenin" aitty. Onyń sózinen úzindini memlekettik Sinhýa agenttigi keltirdi.
"Kedeilikti joiý degen kúrdeli mindet oryndaldy, kedeishilik máselesi tolyq sheshildi, aimaq deńgeiinde kedeilikten aryldyq" dedi ol kedeilikpen kúres jónindegi ulttyq konferentsiia kezinde.
Onyń aitýynsha, "partiia men halyqtyń birigip, kúsh salýynyń arqasynda" 98,9 mln aýyl turǵyny men 128 myń aýyl kedeilikten qutylǵan. 2012 jyldyń sońynan beri 9,6 mln adam jaǵdaiy nashar aýdandardan basqa jaqqa kóshirilgen.
"Kedeilikten qutyldyq, taǵy bir tarihi ǵajaiypqa qol jetkizdik! Bul qytai halqy, Qytai kommýnistik partiiasy men qytai ultynyń uly dańqy" dedi Si Tszinpin eldiń mundai jetistikke Qytai kompartiiasynyń qurylǵanyna 100 jyl tolaiyn degen shaqta (23 shilde) qol jetkizip otyrǵanyn atap ótti.
Buǵan qosa, ol Qytai kedeilikti jappai azaitýdyń "qytailyq modelin" qalyptastyryp, "álemde kedeilikpen kúres salasyna eleýli úles qosty" dedi.
Byltyr 3 jeltoqsanda Si Tszinpin Qytaidyń kedeilikti eńsergenin habarlap, ony "kedeilikti joiýǵa baǵyttalǵan adamzat tarihyndaǵy eń úlken ári belsendi kampaniia" dep ataǵan. Jaqyn arada eldiń kedeilikti tolyq jeńetinin aitqan.
"1,4 mlrd turǵyny bar memlekette ortasha aýqatty qoǵam paida bolady. Bul degenińiz Qytai 2030 jylǵa deiin BUU-nyń turaqty damý maqsatynyń birinshi pýnktin 10 jylǵa erte júzege asyra alatynyn kórsetedi" dep jazdy "Jenmin jibao" basylymy byltyr maýsym aiynda.
Resei men Qytai arasynda qurylǵan dostyq, beibitshilik jáne damý komitetiniń sarapshylar keńesiniń tóraǵasy, shyǵystanýshy Iýrii Tavrovskiidiń málimeti boiynsha, 1978 jyly Qytai turǵyndarynyń 95 paiyzy kedeishilikte ómir súrgen. 2012 jyly olardyń sany 99 million bolǵan.
