Parlament Májilisiniń jalpy otyrysynda «Shanhai yntymaqtastyq uiymynyń ekstremizmge qarsy is-qimyl jónindegi konventsiiasyn ratifikatsiialaý týraly» zań jobasy maquldandy, dep habarlaidy "Ult aqparat".
Konventsiiaǵa Shanhai yntymaqtastyq uiymyna múshe memleketterdiń basshylary 2017 jylǵy maýsymda Nur-Sultan qalasynda qol qoidy.
Qujattyń maqsaty – ShYU-ǵa múshe elderdiń ekstremizmge qarsy is-qimyl salasynda ózara árekettestiginiń tiimdiligin arttyrý.
«Konventsiia ekstremizm túsinigin tuńǵysh ret halyqaralyq deńgeide destrýktivti kórinis retinde belgileidi, onyń mazmuny men ekstremistik is-árekettiń negizgi túrlerin anyqtaidy. Qujat ShYU-ǵa múshe memleketterdiń ekstremizimge qarsy kúres salasynda ózara is-qimylyn qalyptastyrady», - dedi QR Ulttyq qaýipsizdik komiteti tóraǵasynyń orynbasary Nurǵali Bilisbekov.
Konventsiiany iske asyrý: ShYU elderiniń aýmaǵynda ekstremistik uiymdardyń múshelerin kirgizbeý úshin shekaralyq yntymaqtastyqty kúsheitýge; ekstremizmge qarsy sharalar ázirleý men iske asyrýda halyqaralyq jáne óńirlik uiymdarmen ózara is-qimyldy arttyrýǵa; ekstremizmge qarsy is-qimyldyń nasihattalýyn, sonyń ishinde BAQ pen internet jelisinde kúsheitýge; ekstremistik ideologiianyń taralýyn ýaqytyly anyqtaý men jolyn kesý maqsatynda monitoring júrgizýdi jetildirýge múmkindik beredi.
«Konventsiianyń erejelerin iske asyrý qoldanystaǵy zańnamaǵa ózgerister engizýdi, sondai-aq jańa zańdar men ózge de normativtik aktilerdi qabyldaýdy talap etpeidi. Sebebi árbir memlekette kúshine engen normativtik aktiler paidalanylatyn bolady. Zańdy qabyldaý respýblikalyq biýdjetten qosymsha qarjy bólýdi talap etpeidi», - dedi N. Bilisbekov.
