Frantsýz fýtbolshysy, ispaniialyq "Barselona" klýbynyń shabýylshysy Antýan Grizmann qytailyq Huawei kompaniiasymen áriptestigin úzetinin málimdedi. Oǵan sebep - kompaniianyń Shyńjańdaǵy musylmandardy ańdý baǵdarlamasyna qatysyp otyr dep aiyptalýy.
Grizmann Instagram-paraqshasynda Huawei-diń uiǵyrlardy bet-álpeti boiynsha anyqtaityn baǵdarlamaǵa qatysy bar degen aqparattardyń shyǵýyna bailanysty kompaniiamen kontraktisin "dereý" úzetinin jazdy.
"Osy jaǵdaiǵa súiene otyryp, Huawei kompaniiasyn bul aiyptaýlardy joqqa shyǵarýmen shektelmei, tez arada jappai repressiiany aiyptaýǵa jáne óz yqpalyn adam quqyqtarynyń saqtalýyna úles qosý úshin paidalanýǵa shaqyramyn" dedi fýtbolshy.
Grizmann Huawei kompaniiasymen jarnama kelisimshartyna 2017 jyly otyrǵan. Sodan qytailyq telekommýnikatsiia korporatsiiasynyń Frantsiiadaǵy jarnama naýqanynyń basty tulǵasy boldy.
Huawei fýtbolshynyń bul sheshimine ókinish bildiretinin, ózine taǵylǵan aiyptardy jalǵan dep sanaitynyn habarlady.
8 jeltoqsan kúni amerikalyq IPVM kompaniiasy Huawei-diń adamdy jasy, jynysy jáne ulty boiynsha ajyratatyn baǵdarlamaǵa qatysyp otyr dep málimdegen. Huawei kompaniiasy óz tehnologiiasynyń adamnyń ultyn bet-álpeti arqyly anyqtaýǵa qoldanylyp otyrǵanyn joqqa shyǵarady.
Qytai keiingi jyldary Shyńjańdaǵy musylman etnikalyq toptardy jappai qýdalap otyr dep aiyptalyp, álemdik qaýymdastyqtyń qatań synyna ushyrap otyr. Qytaidyń batysyndaǵy ólkede uiǵyr, qazaq jáne qyrǵyz sekildi túrki tildes musylmandar turady. Jýrnalistik zertteýler men ólkeden qashyp shyqqan adamdardyń aitýynsha, Pekin ólkedegi musylmandardy jappai túrmege jaýyp, azaptaǵan. Qytai biligi muny "qaita daiarlaý ortalyqtary" dep atap, musylmandardyń qýdalanyp otyrǵanyn joqqa shyǵarady, muny terrorizmmen kúres úshin jasap otyrǵanyn aitady.
Biraq túrli zertteý bul ortalyqtardyń túrmedegidei qorshalǵanyn kórsetedi, al "ortalyqta" boldym degen Qytaida týǵan etnikalyq azamattar ol jerge túskenderdiń júrip-turý erkindigi joq ekenin, jii azaptalatynyn aitady.
BUU málimetinshe, Qytaidyń osy "ortalyqtarynan" kemi 1 million musylman ótken.
Munyń aldyndaǵy Qytaidyń bul áreketin Germaniia fýtbol quramasynyń oiynshysy, britaniialyq "Arsenal" klýbynyń fýtbolshysy Mesýt Ozil de aiyptaǵan. Osydan keiin Qytai biligi londondyq klýbtyń oiyndaryn kórsetpei qoiǵan.
