Rejisser Jańabek Jetirýovtyń «Shyńyraý» filmi Úndistannyń Tirývanantapýram qalasynda jeltoqsannyń 6 men 13 aralyǵynda ótip jatqan Kerala halyqaralyq kinofestivaline qatysyp jatyr, dep habarlaidy "Ult aqparat" kinostýdiianyń baspasóz qyzmetine silteme jasap.
Kerala shtatynyń mádeniet basqarmasynyń qoldaýymen uiymdastyrylǵan bul iri mádeni is-shara Úndistanda ótkiziletin bedeldi kinofestivalderdiń biri. Osy jyldar aralyǵynda bul festival kórermender arasynda suranysqa ie bolǵan birden bir baiqaýǵa ainaldy. Festival sheńberinde álemniń úzdik filmderi kórsetilip, tanymal rejisserler jáne basqa de kinogerlerdiń qatysýymen kezdesýler ótkiziledi.
Ábish Kekilbaevtyń «Shyńyraý» povesiniń jelisi boiynsha túsirilgen kartina qudyq qazýshy Eńseptiń oqiǵasyn baiandai otyryp, menmendik, baqtalastyq, mahabbat, dostyq, qastandyq syndy adamǵa tán qubylystardy kóteredi.
Bul film Mańǵystaý oblysynda túsirildi. Kartinada Qaraqiia oiysy, Ústirt shoqysy jáne Kaspii teńizi kórinis tabady. Filmdegi basty rólderdi Asylhan Tólepov, Aldabek Shalbaev jáne Aijan Jetirý somdady.
Aita ketsek, bul týyndy Bangladeshte ótken 17-shi halyqaralyq festivaliniń aziialyq filmder baiqaýyna qatysyp, «Úzdik operatorlyq jumys» (operatory Rivkat Ibragimov) júldesin jeńip aldy. Odan bólek, «Shyńyraý» filmi jaqynda ǵana, qarashanyń 19-y men 23-i aralyǵynda Qytaidyń Siamen qalasynda ótken 28-shi «Altyn átesh jáne Júz gúl» atty búkilqytailyq festivaldiń konkýrstyq baǵdarlamasyna qatysyp, Máskeýde Ábish Kekilbaevtyń 80 jyldyǵyna orai uiymdastyrylǵan Qazaqstan kinosy kúnderiniń ashylý saltanatynda kórsetildi.
Al ótken aptada otandyq kinotýyndy Amerikanyń Arizona shtatynda ótken Asian International Film Festival Arizona kinofestivaliniń konkýrstyq baǵdarlamasyna qatysty.
