"Men telefonmen sóilesip turǵanmyn. Qasymda bir jigit ketip bara jatty, oǵan asa mán bermegenmin, sóitsem ol aǵashtyń artynda tyǵylyp, eki minýttan keiin men jaqqa kele jatqan eken. Qarasam maǵan qarai jaqyndap kele jatyr, bir nárse suraidy eken dep oiladym, ol jaqyndap, pyshaqty shyǵaryp, "tynysh" dei bastady. Men qatty tańǵalyp, ne isterimdi bilmei, turyp qaldym, pyshaq suǵyp alatyn shyǵar dep oiladym. Taǵy bir qadym attaǵanda qatty aiǵailap jiberdim. Ol qorqyp, qashyp ketti. Ol ne istegisi kelgenin bilmeimin, biraq óte qorqynyshty jaǵdai, ornymnan qozǵala almai qaldym. Bári bes minýttyń ishinde bolǵan jaǵdai", - deidi jábirlenýshi qyz.
Ol politseilerge aryzdanǵan. Birq politseiler jábirlenýshiniń ózi qysqa kiinip alǵanyn aityp, kúdiktiniń áreketin aqtamaq bolǵan.
"Men Qarataý aýdandyq ishki ister bólimine aryz jazdym. Ýchaskelik politsiia qyzmetkerine barsam, ol maǵan: "Árine, qysqa shorty kiip alypsyń, kez kelgen adamnyń oiy adasady, sondyqtan saǵan jaqyndady", - dedi. Bul qorqynyshty tús, endi qaýipsiz júrý úshin shorty kie almaisyń ba? Osy adamdy taýyp, oqshaýlaý kerek, Qudai saqtasyn, bireýdiń basyna osyndai jaman jaǵdai túspesin", - deidi jábirlenýshi.
Politsiia departamenti áriptesiniń áreketin qyzmettik komissiia qaraitynyn habarlady. Sondai-aq departament kúdiktini izdeý jumystary áli jalǵasyp jatqanyn atap ótti.
"2022 jyldyń 12 shildesinde Shymkent qalasy Qarataý aýdandyq politsiia bólimine qala turǵyny aryzdanǵan. Ol óz aryzynda 2022 jyldyń 4 shildesinde saǵat 22.00 shamasynda Nursát yqshamaýdanynda pyshaq ustaǵan beitanys er adam jaqyndaǵanyn jazǵan. Qazirgi ýaqytta ony anyqtaý úshin jedel-izdestirý sharalary júrgizilip jatyr", - dedi Shymkent qalalyq PD baspasóz qyzmetiniń ókilderi.
