Shymkent TJD perzenthana mańyndaǵy jarylystyń mán-jaiyn aityp berdi, - dep habarlaidy "Ult aqparat".
Qalalyq Tótenshe jaǵdailar departamenti baspasóz qyzmetiniń málimetinshe, órt týraly habarlama saǵat 11:36-da túsken. Órt sóndirýshiler jetken kezde jarylys saldarynan «Mejbolnichnaia 138 apteka» JShS-ne tiesili 2 qabatty jeke turǵan ǵimarattan órt shyqqany anyqtalǵan.
Ǵimarattyń jalpy aýdany – 360 sharshy metr. Qabyrǵalary - kirpishten, shatyry gofr kartonmen qaptalǵan. Tilsiz jaý 55 sharshy metri aýmaqty sharpydy.
Jarylys saldarynan 130 sharshy metr aýmaqta ǵimarat ishinara opyrylyp, 5 qabatty turǵyn úidiń janyndaǵy páterdiń balkony men terezeleri, 7 avtokólik zaqymdanǵan. Jalyndy aýyzdyqtaýǵa TJD 37 qyzmetkeri jáne 9 birlik tehnika jumyldyrylǵan. Órt saǵat 12:06-da sóndirildi.
«Órt sóndirý kezinde Tótenshe jaǵdailar departamentiniń kúshteri órt ornynan janyp ketken er adamnyń máiitin tapty. Onyń kim ekeni anyqtalyp jatyr. Adyn ala boljam boiynsha kúzetshi bolýy múmkin. Qazir jarylys sebebi anyqtalyp jatyr, tótenshe jaǵdaidyń saldarymen kúres jumystary jalǵasýda», - delingen habarlamada.
Tótenshe jaǵdai ornyna qala ákimi Murat Áitenov, sondai-aq quqyq qorǵaý organdary shuǵyl shyqty.
Aita keteiik, buǵan deiin Shymkent qalasynda dárilik erindiler jasaityn dárihanada jarylys bolǵany habarlandy. Aldyn ala boljam boiynsha jarylysqa gazdyń jinalýy sebep bolǵan.
