Shymkenttegi dámhanalardyń birinde bolǵan atys saldarynan bir adam kóz jumyp, bes adam zardap shekti. Tórteýi áli aýrýhanada jatyr. Politsiia qarýly shabýyl uiymdastyrǵan eki adamnyń kim ekenin anyqtady. Alaida olar áli ustalǵan joq, – «Ult aqparat» KTK arnasyna silteme.
Shymkent qalasy politsiia departamentiniń basshysy Eraly Jumahanbetovtyń aitýynsha, atys uiymdastyrǵandardyń arasynda buǵan deiin sottalǵandar da bar.
«Kúdiktiler bar, kimniń oq atqany anyqtaldy. Qazir buǵan ne sebep bolǵany tekserilip jatyr. Arasynda buǵan deiin sottalǵandar da bar. Bul nebári bir táýliktiń ishinde júrgizilgen jumys nátijesi. Qarý tárkilendi» dedi ol.
Politseiler qylmysqa kólikte tabylǵan qomaqty aqshanyń qandai qatysy bar ekenin de anyqtap jatyr.
Teńge jáne dollarmen saqtalǵan qarajat dámhana mańynda turǵan kólikterdiń birinen tabylǵan bolatyn.
Zardap shekken eki adam áli jansaqtaý bóliminde jatyr. Ekeýine de oq tigen.
«Tórt er adam aýrýhanaǵa jetkizildi. Bárine oq tigen, jaǵdaiy aýyr. Eki adamǵa ota jasaldy. Al ekeýi hirýrgiia jáne travmatologiia bólimine aýystyryldy. Besinshi adam dárigerler teksergen soń birden úiine jiberildi» dedi №1 Shymkent aýrýhanasynyń bólim basshysy Ótkirjan Moldahanov.
Politsiia zardap shekkender men oq atqan adamdardyń bir-birimen tanystyǵyn anyqtap jatyr. Tergeýshiler qarýdy saraptamaǵa jiberdi. Qaskóiler ony oqiǵa ornynan 300 metr jerde laqtyryp ketken.
Is eki bap boiynsha tergelip jatyr: adam óltirý jáne zańsyz qarý saqtaý.
Oqiǵa 29 qazan kúni saǵat 17:30-da Arǵynbekov kóshesindegi dámhanada boldy. Kýágerlerdiń aitýynsha, eki adam oq atqan.
Oblystyq prokýratýra oqiǵa saldarynan bir adam kóz jumǵanyn habarlady.
