Shymkent politseileri oqiǵa ornyndaǵy videony jelide taratqan adamdardy izdep jatyr. Oqiǵa ornynda jumys istegen kriminalisterdiń jumysy da videoǵa túsip qalǵan.
Video atystan keiin túsirilgen. Politsiia bul videony kim túsirgenin bilmeitinin aitty. Onyń avtory izdestirilip jatyr, dep habarlaidy "Astana" telearnasy.
"Videonyń áleýmettik jelide taralyp ketýine bailanysty qyzmettik tekseris bastaldy", - dedi Shymkent politsiia departamentiniń ishki jáne syrtqy kommýnikatsiia basqarmasynyń jetekshisi Ásel Sádenova.
Shymkenttegi atys
Oqiǵa 29 qazan kúni saǵat 17:30-da Arǵynbekov kóshesindegi dámhanada boldy. Kýágerlerdiń aitýynsha, eki adam oq atqan.
Oblystyq prokýratýra oqiǵa saldarynan bir adam kóz jumǵanyn habarlady.
Politsiia zardap shekkender men oq atqan adamdardyń bir-birimen tanystyǵyn anyqtap jatyr. Tergeýshiler qarýdy saraptamaǵa jiberdi. Qaskóiler ony oqiǵa ornynan 300 metr jerde laqtyryp ketken.
Is eki bap boiynsha tergelip jatyr: adam óltirý jáne zańsyz qarý saqtaý.
