Shymkent qalasynda júkti áielderdi esepke qoiý úshin emhanada 1 myń teńge, perzenthanada týý týraly kýálikti berý úshin 2 myń teńge aqsha talap etilip kelgen. Bul týraly búgin QR Sybailas jemqorlyqqa qarsy is-qimyl agenttiginiń onlain-brifinginde aityldy, dep habarlaidy "Ult aqparat".
Málim etilgendei, politsiia qyzmetkerlerine qatysty - 30, bilim berý salasynda - 26 jáne densaýlyq saqtaý qyzmetkerleriniń ústinen 23shaǵym túsken.
Shaǵymdardyń basym bóliginde qylmystyq jáne ákimshilik jaýapkershilikke tartpaý úshin parany bopsalaý (17), kedergisiz jol júrý, anyqtamalar, júrgizýshi kýálikterin, diplomdar berý, múgedektikti, járdemaqylardy resimdeý, jumysqa ornalastyrý jáne ózge de faktiler bar.
Shaǵymdar boiynsha óńirler bólinisinde Túrkistan oblysy (28), Almaty qalasy (14), Shymkent (10) jáne Nur-Sultan qalalary (11) kósh bastap tur.
Mysaly, biyl 15 aqpanda «1424 Call-ortalyǵy» arqyly kelip túsken shaǵym boiynsha Túrkistan oblysy aýdandarynyń birinde – bas maman, aýyldyq okrýg ákimdiginiń ataýly áleýmettik kómek berý jónindegi komissiiasynyń tóraǵasy járdemaqyny kedergisiz alý úshin 7 000 teńge somasynda para alý sátinde áshkerelendi.
«Sondai-aq Shymkent qalasy boiynsha departament júkti áielderdi esepke qoiý úshin emhanada 1 myń teńgeden, perzenthanada týý týraly kýálikti berý úshin 2 myń teńgeden, ýniversitette emtihannan baǵa alý úshin belgili bir stavkalar belgilengen aqshalai qarajat alýdy toqtatty. Atalǵan mekemelerde Facebook áleýmettik jelisiniń tikelei efirinde ujymdyq jinalystar ótkizildi», - dedi spiker.
Budan bólek, Batys Qazaqstan oblysynyń meditsinalyq kolledjinde stýdentterden emtihan tapsyrý úshin turaqty túrde aqsha jinaý faktisi boiynsha 4 oqytýshy tártiptik jaýapkershilikke tartyldy.
Semei qalasynyń BSMK-niń 2 dárigerine tegin kompiýterlik tomografiia júrgizýge múgedekten aqsha alǵany úshin «sógis» jariialady. ShQO Semei aimaǵy boiynsha MKB qyzmetkerleriniń aralasýynan keiin múgedek janǵa aqshasy qaitaryldy.
