Ótken senbide jarylys bolǵan Shymkent dárihanasynyń ieleri bári kezdeisoq bolǵan joq dep boljaidy. Olar tótenshe oqiǵadan 15 minýt buryn jabyq bólmede qozǵalys sensorlary qosylyp ketti dep otyr, dep habarlaidy Sputnik Qazaqstan agenttigi KTK telearnasyna silteme jasap.
Qaiǵyly oqiǵa birden úsh adamnyń ómirin qidy: 43 jastaǵy kúzetshi, 42 jastaǵy perzenthana qyzmetkeri jáne 18 kúndik sábi.
Taǵy jeti adam – medbikeler jáne jumysshylar qazir aýrýhanada. Olarda synyq, kógerý jáne kesilgen jaralar bar.
"Bir nárse jarylǵan kezde biz kóshede boldyq, ystyq aýa sezildi. Men aryqqa quladym, ústime kirpishter tústi. Bólimsheden áielder kelip, bárimiz aqyryndap sol jerden shyqtyq", - deidi medbike Klara Idoiatova.
Aldyn ala málimet boiynsha, dárihana ǵimaratynda eki tonna sýtegi totyǵy bolǵan, ol ydyraý kezinde ońai jarylyp ketedi. Bosanǵan áielderdi, júkti áielder men balalardy evakýatsiialaýǵa keshede ótip bara jatqan adamdar da kómektesti.
"Jarylys bolǵanda medbike, dáriger, birde-bir adam qashyp ketpedi. Adamdar tolyǵymen evakýatsiialanǵanǵa deiin barlyǵy jumys ornynda qaldy. Turǵyndar, kórshiler keldi, osy perinataldyq ortalyqtyń janynda turatyndar óz kólikterimen evakýatsiialady", - deidi Túrkistan oblysy Qoǵamdyq densaýlyq basqarmasynyń basshysy Marat Pashimov.
Soqqy tolqynynan dárihana ǵimaraty qulady. Aýrýhananyń terezeleri synyp, tehnikaǵa zaqym keldi. Jaqyn mańdaǵy 4 úi - 280 abonent áli kúnge deiin gazsyz otyr. Óitkeni qubyr zaqymdanǵan. Perzenthanaǵa eń jaqyn ornalasqan birneshe otbasy baspanasyz qaldy.
Múlkine zaqym kelgen turǵyndar ujymdyq aryz jazdy. Olar shyǵynnyń tolyqtai ótelýin talap etip otyr. Dárihana ieleri bas tartyp otyrǵan joq, alaida jarylys sebebin anyqtaýdy surady.
"Áinektiń synýy, qozǵalys sensory jáne SMJ (magnittik bailanys) datchikteri iske qosylǵan. Saǵat 11:22-de-habarlama keldi, al jarylys 11:37-de boldy. Iaǵni, signal túsken sátten bastap jarylysqa deiin shamamen on bes minýt ótti. Biz qaýipsizdik erejelerin, qaýipti zattardy saqtaýdyń barlyq talabyn saqtadyq. Múmkin syrttan kelgen bolar? Men muny joqqa shyǵara almaimyn", - deidi" Farm-Sintez " dárihanasynyń zańgeri Nurjan Pakeev.
Jarylys faktisi boiynsha arnaiy komissiia quryldy. Ol jarylystyń sebebin anyqtap, kinálilerdi anyqtaýy kerek. Perinataldyq ortalyqtaǵy barlyq patsient pen meditsinalyq qyzmetkerler basqa úsh beiindi aýrýhanalarǵa aýystyryldy.
