Shymkentte jappai tóbelesten taiaq jep, komaǵa kúsken 17 jastaǵy jasóspirim kóz jumdy.
Túrkistan oblystyq balalar aýrýhanasynyń jansaqtaý bóliminde jatqan Abzal Ótkirov bas mi jaraqatynyń aýyrlyǵynan, es jimaǵan kúiinde jantásilim etti, dep habarlaidy QazAqparat tilshisi.
Túrkistan oblystyq qoǵamdyq densaýlyq basqarmasynyń málimetinshe, jasóspirim aýrýhanaǵa 23 mamyr kúni jatqyzylǵan.
«Naýqas 23.05.2020j túngi saǵat 01:55-te meditsinalyq jedel-járdem qyzmetimen aýyr halde jetkizilgen. Naýqas aýyr jaraqat alǵan bolatyn. Aýrýhana dárigerleri jedel túrde naýqasty tiisti meditsinalyq tekserýden ótkizip, zertteýler júrgizdi. Naýqastyń bas miyna qan ketkeni anyqtaldy. Jedel túrde ota – dekompressivti trepanatsiiasy jasalyndy. Naýqasqa alǵan jaraqatyna jáne jaǵdaiynyń aýyrlyǵyna bailanysty qajetti em jansaqtaý bóliminde kórsetilgen. Ony uzaq jolǵa alyp shyǵý qaýipti bolǵandyqtan dárigerler Ulttyq ǵylymi ortalyǵynynyń mamandarynan telemeditsina arqyly keńes alyp, emdik sharalardy jasady. Alaida 1-shi maýsym, túngi saǵat 23:45-te jasóspirim kóz jumdy. Komada jatqan kúii es jimai qaitys boldy», - delingen basqarmasynyń habarlamasynda.
Aita keteiik, buǵan deiin marqumnyń týystary 22 mamyr kúni Shymkenttiń irgesindegi Maiatas eldimekeninde jappai tóbeles bolǵanyn aitqan. Onda bolǵan eki jasóspirim soqqy alyp, 17 jastaǵy jasóspirim aýyr jaraqatymen aýrýhanaǵa túsken. Naýqas balanyń aǵasy tóbeles kezinde tipti inisiniń basyn shlakoblokpen urǵany, tipti tyrnaqtaryn julyp tastaǵanyn týraly aitqan. Qazirgi tańda Shymkenttiń Politsiia departamenti tóbeleske bailanysty qylmystyq is qozǵap, tergeý amaldaryn júrgizýde.
