Foto: QR OAM
Jańa oqý jyly qarsańynda Oqý-aǵartý ministri Ǵani Beisembaev Shymkent qalasyndaǵy birqatar bilim berý uiymdaryn aralap, mektepterdiń qaýipsizdigi, infraqurylymy jáne pedagogtermen qamtamasyz etilýi máselelerin qarady, dep habarlaidy Ult.kz.
Ministrdiń aitýynsha, qala mektepteri jańa deńgeidegi qaýipsizdik júiesimen jabdyqtalǵan. Barlyq bilim ordalary beinebaqylaý júielerine qosylyp, beinejazbalar IIM Jedel basqarý ortalyqtaryna jáne ákimdiktiń ahýaldyq ortalyǵyna tikelei taratylady. Bul kez kelgen jaǵdaiǵa jedel áreket etýge múmkindik beredi.
Infraqurylym boiynsha da aitarlyqtai ózgerister bar. Memleket basshysynyń bastamasymen iske asqan «Keleshek mektebi» ulttyq jobasy aiasynda Shymkentte 12 jańa mektep salyndy. Sonyń biri – 2030 oqýshyǵa arnalǵan №144 mektep. Qala ákimi qazirgi tańda úsh aýysymdy oqytý máselesi tolyq joiylǵanyn málimdedi.
Sonymen birge, renovatsiia baǵdarlamasy boiynsha 11 mektepte kúrdeli jóndeý júrgizilýde. Máselen, Sairam turǵyn alabyndaǵy №109 mektep tolyq jańartylyp, qazirgi zaman talaptaryna sai jabdyqtaldy.
Bilim sapasyn arttyrý úshin kadr máselesine de kóńil bólindi. Ministr muǵalimdermen kezdesip, mektep tek oqýshylar úshin emes, pedagogter úshin de kásibi damý alańy bolýy kerektigin atap ótti.
Sapar barysynda inkliýzivti bilim berý jaiy da qaraldy. Qazir Shymkent qalasynda balabaqshalarda – 96%, mektepterde – 95% balalar inkliýzivti oqýmen qamtylǵan. Ulttyq deńgeide «Erekshe bilimdi qajet etetin balalardy keshendi qoldaý týraly» zań jobasy daiyndalýda.
Budan bólek, ministr agrarlyq-tehnikalyq kolledjdiń materialdyq-tehnikalyq bazasymen jáne qosymsha bilim berý uiymdarynyń jumysyna toqtaldy. Sońǵy úsh jylda elde qosymsha bilim berý mekemeleriniń sany eki ese ósse, biyldyń ózinde Shymkentke 400 jańa uiym qosylǵan.
Aita keteiik, búginde qalada 1100-den astam bilim berý uiymy bar. Onyń ishinde 290 mektepte 271 myń oqýshy bilim alýda, 32 myńnan astam muǵalim eńbek etýde.
