Shymkentte úsh balanyń ólimine sebepshi bolǵan dezinfektor 5 jylǵa bas bostandyǵynan aiyryldy. 42 jastaǵy Bolat Jánibekov sot sheshimimen jazasyn qaýipsizdigi tómen túzeý mekemesinde óteitin boldy, dep habarlaidy "Ult aqparat".
Aiyptalýshy Qylmystyq kodekstiń 304 babynyń 3-shi tarmaǵymen kináli dep tanylyp, jábirlenýshi tarapqa 5 mln teńge moraldik ótemaqy tóleýge mindetteldi. Sottalýshy úkimdi túzeý koloniiasynan onlain rejimde tyńdady. Aita keteiik, 11 aiǵa sozylǵan protseste Bolat Jánibekovtiń qylmystyq áreketi aiǵaqty zattarmen tolyq dáleldengen. Oǵan qosa birneshe kýágerler men jábirlenýshilerdiń bergen jaýaptary negizge alynǵan. Sot qos ulynan aiyrylǵan Taspolatovtar otbasyna ótemaqyny eki aidyń ishinde tóleýi tiis boldy.
«Jábirlenýshi tarapynan talap aryz túsken. Sol talap aryz sottyń shemimen tolyǵymen qanaǵattantyrýǵa jatady. Óitkeni, ol otbasynda tek 2 ul bala bolǵan. Sol 2 ul bala da qazaǵa ushyraǵan. Baldardyń ómiri árine, ol aqshamen teńelmeidi. Biraq, sot osy kórgen azaptaryn moraldik zalaldy olar kórsetken 5 mln teńgeni tolyǵymen ónidirge jatady dep tapty», - dedi sýdia Svetlana Shynalieva.
Aiyptalýshynyń tergeý kezinde ótkizgen árbir kúni eki kún dep belgilendi. Sondai-aq, jándikterdi zalalsyzdandyrý jumysymen 3 jylǵa deiin ainalysýǵa tyiym salyndy.
Eske sala keteiik, qaiǵyly jaǵdai ótken jyly qarasha aiynda tirkelgen bolatyn. Kópqabatty úidegi páterlerdiń birinde ziiankesterge qarsy zalalsyzdandyrý júrgizilgennen keiin bir otbasy aýrýhanaǵa túsip, onyń 11 ailyq jáne 4 jasar eki balasy kóz jumǵan edi. Al, eki aidan keiin dál osy sottalýshynyń júrgizgen dezinfektsiiasynan taǵy bir januianyń 8 ailyq nárestesi baqilyq boldy.
